نهاية العهد القديم وبداية العهد الجديد
شعر: سيد لطفي السيد
انا اول الريح والحياة
ورزاز بخار المياه
واول مطر
أبو الخضار والعمار
وأول المعتمر
انا النهار المجاب
وسر ليل مستجاب
فيه الدعا والفجر
النيل دموعي لما كنت حزين
والليل سهادي لما دوبت انين
والطين دا بالي لما كان رايق
لمي الحقائق واعرفي انا مين
انا المكان والسؤال
والمستطاع والمحال
وفي صدري ريحة واحدة بنت الحلال
وفي عيني طيف انسان وبينبت
وفي ايدي بذرة خمسميت انسان
ارضي ما بين الصبر والامكان
مسقية كوباية تاريخ منقوع في دم ريحان
وبرغم كل اللي جاري انما فرحان
والفرح مش دايم
ولا دام في قلب الحزن
انا اللي من نار دموعي
نزل جليد المزن
الارض كانت خراب
وانا اول السلسال
وفي صدري ريحة واحدة بنت حلال
وعاشرتها ـ لكنها ،
جابت بلد مغلوبة علي امرها
لو كان بايدي كنت حررتها
لكنها
وعدت بيوم النصر
الشمس كات بتصلي في كنيسة
والوقت كان يشبه أوان العصر
طلعت ترتل ف الميدان اية
في البدء كات الكلمة
والكلمة كانت مصر
ليست هناك تعليقات:
إرسال تعليق