الدنيا لما تكشر
بقلم: خالد السيد على
جمهــورية السعادة.. تقدم.. فيلم .. قول أنا حمار.. تأليف وإخراج وتمثيل.. نجوم بتحب الحمير.. تدور الأحداث حول بنى آدم ثقلت همومه وزادت أوجاعه فقرر أن يكون حماراً مثل الآخريين..هل يستطيع أم ..لأ ..؟!!
بعد معاناة شديدة وطابور من الانتظار الذي لا يتحمله سوى الحيوانات الطيبة استطاع البني آدم أن يقابل الدكتور شجار خبير في علم نفس الحيوانات وعمليات التجميل للسادة الحيوانات الأليفة أيضاً..
وبدأ الفيلم الروائي القصيـر بمقابلة البني آدم المتعوس والعبوس بالدكتور شحار .. فهيا بنا لنرى ماذا حدث ..؟
مشهد1 نهار/عتمه /اسطبل الدكتور شحار
- يعنى أنت مصّر إنك تبقى حمار؟
- طبعاً يا كتور شحار.. إشمعنى أنا ما كل اللي حواليا حمير.. يعنى أنا اللي وقعت من قعر القفه..!! وبعدين أنا جيت على سمعتك إنك أحسن دكتور حمار على مستوى الحيوانات..
- خلاص..أنا حأكتبلك على روشته تمشى عليها وتجيلي بعد أسبوع.. بص يا سيدي.. كل اللي حتعمله تقول كل يوم أنا حمااااااار.. تلت مرات قبل وبعد الأكل..
- ماشى يا دكتور أما نشوف أخرتها...!!
تلاشى
مشهد 2 ليل/ عتمه جداً/ اسطبل الدكتور شحار
ظهور تدريجي على لوحة مكتوب عليها بعد مرور أسبوع..
يذهب البني آدم للدكتور شحار وهو مازال مقطباً..
- أنا مش عارف أنت زعلان قوى كده ليه؟
- أسبوع يادكتور عمّال أقول أنا حمار أنا حمار أنا حمار وما فيش فأيده .. وكل اللي حواليا عمّاليين يعايروني ..
- آنت مش رفست كام رفسه في اليوم.؟
- آه..
- وديلك نبت شويه؟
- آه..
- وودانك طولت شويتين؟
- آه..
- وماشى في حالك زيينا؟
- آه..
- وما إعترضتش على أي حاجه في البلد.؟
- آه..
- وبتاكل برسيم وشكوريه وخضروات مسرطنه؟
- آه.. يادكتورآآآآآآآآه ..
- طب ما آنت حمار أهو..!!
- يادكتور افهمني أنا لسه جحش.. أنا عايز أبقى حمار كبييييييييييييييييير..!!!
- طب مش قولي كده من الأول.. خد الروشته الجديدة .. بص يا سيدي.. تقول كل يوم لمدة أسبوع أنا حمار تلت مرات قبل وبعد الأكل وتنهق وآنت بتجرى ورا الأوتوبيس وترفس أي حد يقابلك .. وتقف فى طابور البرسيم من غير كلام. قصدى العيش..
تلاشى
مشهد 3 نهار/ عتمه قوى/ اسطبل الدكتور شحار
بعد مرور أسبوع أخر..
كانت علامات الغضب واضحة على البني آدم ..مع لمحات من البؤس المتسرب إلى أساريره.. بينما الدكتور شحار باسماً بلا مبالاة ويكاد يكتم الضحك..
- ها أخبار الحمار إيه؟
- بص يا دكتور.. العلاج بتاعك واضح كده إنه مش نافع معايا .. لو مش حتعرف تعالجني قول.. وأنا أروح لحمار تانى..
- ماهو أنت اللي منحوس.. أنت مشيت على الدوا بانتظام؟
- طبعاً.. نهقت ورفست وقلت أنا حماااااار وبرضه أنا زى ما أنا.
- أكيد ما نهقتش كويس ولا رفست كويس...
- اسمع يا دكتور.. عشان خاطر الفول والبرسيم اللى بينا أنا حأديلك فرصه أخيرة .. وادى تمن الكشف تانى.. يا تخلينى حمااااااااار.. يا أرفسك وأمشى..
- خلاص خلاص.. أنا حأكتبلك على روشته اللى هيه.. تمشى عليها لمدة أسبوع وبعدين أشوفك..
البنى آدم بلسان حاله:
- قول.. قول يادكتور الغبرة..
تلاشى
مشهد 4 ليل/ عتمه قوى قوى/ اسطبل الدكتور شحار
بعد مرور أسبوع ثالث.. لم يتمكن البني آدم من الخروج من منزله وقد بدا عليه كل علامات الانهيار وعدم التصديق لما هو فيه...فكان الحوار عبر الهاتف هو خير وسيلة لتواصل الحمير..
- ألوه.. أيوه يا دكتور شحار..
- إيه ما جتش ليه طمنى العلاج الأخير جاب نتيجة؟
- د ه أنت لو شوفتنى مش حتعرفنى خاااااااااااالص.
- أكيد بقيت حمار كبير قوى قوى..
- يا ريت ده أنا لا أسر عدو ولا حبيب..!!
- قلقتنى.. قولي إيه اللي حصل بالضبط؟
- عملت كل اللي أنت قلتلي عليه.. قلت نعم وحاااااااااااضر.. ودفعت الضرايب والبرسيم في بقي.. واشتغلت أربع وظايف في اليوم..وانتخبت وخدت المعلوم.. ودفعت رسوم الزبالة رغم أنها لسه مركونة عندي من ست شهور وماحدش أخدها..وهللت وطبلت وزمرت ووقفت في طابور البرسيم من عين شمس لغاية المريوطية.. وأخدته .. لقيت فيه شويه مسامير سألتهم على الحديد قالوا لىّ بلاش طمع...
- لغاية كده كويس وبعدين..
- قلت أكيد خلاص حأبقى حمار خصوصاً لما كملت باقى الدوا..
- إزاى؟
- هللت وفى الشوارع بعد كل المبارايات.. وتابعت كل أغاني الكليبات.. ودخلت أفلام السيما.. وعملت نفسي مش واخد بالى من اللي بيحصل في المنطقة.. من الأخر كبرت الجمجمة.. وقلت أشوف أكل عيشى الأول جوه وبعدين أبص بره.. وأهو ربنا موجود..
- خلصني أنا مزنوق وعايز اخش الحمام.. وبعدين ؟
- ما أطولش عليك .. لقيت نفسي في هيصة وزمبليطه ودماغي صدعت ومعدتي وجعتني.. قلت أخد برشام للصداع ودوا للمعدى.. وخدت..
- إيه اللي حصل خلصني بأقولك مزنوق محصور حأعملها على روحي..!!
- لقيت في حتت حمرا بتظهر في جسمي وعينيا لونها بيتغير وديلى رفع وطول وعمّال اتنطط على الشجر ونفسي هفانى للموز والسودانى أبو قشره..
- كل ده من الدوا.. وهو الدوا يعمل كل ده؟
- ماهو للأسف الدوا طلع من ضمن الأدوية المغشوشة..
قطع
مشهد 5 ليل/ عتمه ممطر/ اسطبل الدكتور شحار
يأس الدكتور شحار من حالة البني آدم وقد بدا على البني آدم الاستسلام للواقع المرير..
- وبعدين يادكتور شحار العمل إيه؟.. لا حصلت بني آدم ولا حتى حمار.. أخرتها اتقلب قرد..!!
- ماهو إحنا في جمهورية السعادة .. يا حمير يا قرود.. حظك كده خليك قرد مش وحش أنت أحسن من غيرك !!
- لاااااااا.. أنا عايز ابقى حمار.. مش عايز حد يعايرني بالحته الحمرا..
- طول ما في عصايا وسلسله ورق حتفضل قرد..
- لااااااا.. أنا بأحب اللجام والكرباج اكتر..
- بص أنت من الأخر لازم تسافر بلاد بره.. تعمل عملية وترجع بني آدم الأول وبعدين نشوف حل لحكاية الحمار دى..!
- ماشى.. بس وصيتي ليك يا دكتور شحار.. لو العبارة غرقت في البحر كالعادة ابقي وزع الفلوس اللي حيطلعوها للميت على عيال الشوارع..!!
تلاشى
مشهد6 فوتومونتاج /ليل/نهار/ عتمه برضه
يسافــــــر القرد للخارج....
لقطات متلاحقة للرحلة.. توضح لنا .. أن العجيب والمدهش و المعجزة أن العبارة لــم تغرق هذه المرة..
تحتفل الشركة المالكة للعبارة بهذه المناسبة وتـــــــوزع أطواق نجاة للمسافرين وزوارق مطاطية..
العبارة مرة أخرى في البحر..
ولكنها تغرق... فأطواق النجاة
مخرومة و الزوارق غير صالحه ..
القبطان يقفز من العبارة..
القرد يرجع إلى البلد زى كما هو .. قرد..
كادر ثابت..
وتيترات النهاية..
ليست هناك تعليقات:
إرسال تعليق