نحلم
شعر: حامد أنورأبسط حقوق البوح
نشوف فى الحلم شمس وحياة
أو ينبوع مشاعر خنقها طول السكات
أو شبح المغيب
نحلم..
والحلم جايز يكون باب المرور للنور
بوابة متفرقشي بين مؤمن وعاصي
ولا بتفصل ما بين سلطان مخاوي بصولجان
أو عبد بتكسره العوزه ويذله الرغيف
نحلم..
والقلب مرعوش ضعيف
نحتمي فى بكره اللى جاي من عباية بيضا
أبيض من اللبن الحليب
من طول انتظار شجر الصبار للندي
زي الغريب لما يحس الطريق بعد طول مشوار
زي بصيص النور لما يزور الضرير
أنا قلبي زي دول تمام
عطشان يفضفض ع الملأ ..
يفرش بحلمه النور ما يخافشى الضلام
الحلم لسه بيحسوه حرام
لكنى دايما كنت بخاف ع البشر
لو مرة فاض حلمهم ع الجسر
أو سرسب بشكل عشوائى وجاب النيل لغرب البلاد
راح يجرى ايه؟؟
هاتفك ضفايرها البنات وتغنى للقمر؟!
ولا برضه هتموت خجل
لسه الخلايق ف دى البلاد بتخبي دايما حلمها
وتموت عطش..
لسه الحلم جوانا بيموت بطىء
ليست هناك تعليقات:
إرسال تعليق