مسرحية الخـلاص
عن ثورة 25 يناير 2011
تأليف:حامد أبو النجا*
الممثلون
ــــــــــــــــ
1 - امرأة فى منتصف الأربعينات تمثل دور مصر
2 – رمزى بك رجل بمنتصف الخمسينات
صاحب نفوز
3 – سيد شاب فى الثلاثينات - بلطجي
( مجموعة الشباب أ )
4 – شاب - 1 شاب فى العشرينات
5 – شاب - 2 شاب فى أواخر العشرينات
6 – شاب - 3 شاب فى أوائل الثلاثينات
7 – شاب - 4 شاب فى منتصف العشرينات
8 – فتاة - 1 فتاة فى منتصف العشرينات
9 – فتاة – 2 فى أواخر العشرينات
( مجموعة الرجال ب )
10 – رجل - 1 رجل فى الأربعينات بلحية
11 – رجل – 2 رجل فى الثلاثينات مسيحى
يحمل صليب خشب بيده
12رجل – 3 رجل فى الأربعينات يحمل
مصحف بيده له لحية
13 – رجل - 4 رجل فى أواخر الأربعينات
14 – رجل - 5 رجل فى الخمسينات
( مجموعة البلطجية )
العدد 5 أشخاص
( المسرح به مجموعة أ من الشباب والفتيات ، ومجموعة ب من الرجال - يظهرون فى حالة من اليأس والضياع وشرود الفكر – منهم من يجلس ومنهم من يقف ومنهم من يتحرك هنا وهناك ، ويجلس فى ركن آخر من المسرح سيد البلطجي الذي يتناول الشيشة ومعه بعض من زملائه البلطجية يجلسون حوله )
رجل – 1 الشمس بتطلع كل يوم الصبح بس في كتير مننا بيشفاهش – علشان بقينا ما بنشفش فى النور من كتر الضلمة أللي عايشين فيها
رجل – 2 الحياة هيه هيه – أللى ينام فيه بنصبح فيه – ما فيش جديد
رجل – 3 زي ما يكون بنموت بالبطيء اليأس خلانا ما نفكرش غير فى لقمة العيش كل يوم بيومه
رجل – 4 ظلم وقهر – ما فيش عدالة ولا
عاد صبر
رجل – 5 الخوف عشش جوانا – والسواد بقي لون دنيانا
شاب – 1 كل واحد فينا عنده حلم – نفسه يحققه
شاب – 2 كل واحد فينا عنده أمل يتمني يوصله
فتاة – 1 نفسنا نشوف بكره أحسن
شاب – 3 نفسنا نحس أن دي بلدنا
شاب – 4 مش عايزين أكتر من حقوق بسيطة
فتاة -2 عايزين نعيش النهاردة وإحنا مش خايفين من بكرة
سيد ( مقاطعا وكأنه يقول موال ولكن بلحن عشوائي ) يا عين يا ليل يا عينى – أنسى يا بنى أنت وهيه ، عيش أيامك بالعافية – وامبارح هاته مكان بكره وخليه على بالك – أوعى تغرٌك أحلامك – الحجر شديد قدامك ، ههههههههههه
رجل -1 عارفين ليه كلنا خايفين من بكرة ؟ علشان مالوش ملامح – علشان مش باين - مش واضح
رجل - 2 بكره فى نظرنا فى حكم الميت ما فيش فرق بينه وبين إمبارح – كل يوم بنشيل هم فوق همنا
رجل - 3 والهم بيكبر والحمل بيتقل – وبقينا شياب وإحنا فى عز شبابنا
رجل - 4 وشبابنا بيصغر وعمرنا بيكبر والفرحة يمكن تكون قدمنا بس مش طايلينها مش حسينها
رجل - 5 بقينا عايشين فى سجن كبير – كلنا محكوم علينا نفضل فى المرض والفقر والجهل – خير بلدنا بيتسرق وإحنا بنتسرق معاه
شاب – 1 الناس لازم تفوق – لازم تصحي
- لازم تتكلم
سيد وماله – تفوق وتصحي وتتكلم آه - ما يجراش حاجة – اللى عايز يتكلم يتكلم – وبعدين ما أنتم بتتكلموا كتير ما زهقتوش من الكلام – ما تسيبوا المركب ماشية
فتاة – 2 المركب بتغرق شوية شوية
سيد قضاء وقدر
شاب – 3 الناس لازم تقوم لازم تتحرك
سيد لاء – وألف لاء - تقوم وتتحرك لاء – تتكلم آه – الناس تتكلم زي ما هي عايزه – أنما تقوم ... لاء - دا حتى يبقي عيب - أللى ها يفكر أنه يقوم ويتحرك ويعمل قلق – يبقي هو الجاني على نفسه – خلٌيكم زي ما أنتم – أنتم كده كويسسين – كفاية عليكم تتفرجوا وتتكلموا زي ما أنتم عايزين – لكن تقوموا وتتحركوا وتتعبوا نفسيكم لاء بلاش خليكم مرتاحين – وإحنا مالناش بركة إلٌا أنتم - هههههههه
( تدخل المرأة ألتي تمثل دور مصر- ترتدى جلباب غامق اللون، وعلى رأسها شال غامق بلون آخر – تظهر على أنها عجوز – تنحنى للأمام وتتوكأ على عصا )
مصر ولادى – ولادى - أنتم فين ؟ فين ولادى ؟ انا سمعاهم – سمعاهم بيتوجعوا – بيصرخوا – بس هم فين ؟ مش لقياهم – مش شيفاهم – بس سمعاهم –
يا ناس يا ناس - محدش شاف ولادى ؟
سيد ( يترك الشيشة ويتحرك نحو السيدة فى حالة من اللا وعى ) بتدورى على حد يا حاجة
مصر ( تفاجأ به وتشمئز من ريحة فمه ) هه لاء – مش أنت
سيد هو ايه اللى لاء مش أنت – أٌمٌال مين ؟
مصر لاء – ما بدورش على حد
سيد الله – مش أنت عمالة تقولى – ما حدش شاف ولادى
مصر آه – ولادى – ولادى حبايبى
سيد هم تايهين يا حاجة ؟
مصر آه – تايهين ( تتركه وتتقدم بضع خطوات ) تايهين من زمان – من زمان قوى
سيد ياه
مصر ييجى من 30 سنة
سيد 30 سنة
مصر وأكتر
سيد ولسه بتدورى عليهم – يا صبرك
مصر ( فى حالة من الشرود ) ولادى
ولادى – أنى سمعاكم – بس أنتم فين ؟ ولادى ولادى
( تخرج )
سيد ( يضرب كف على كف متعجبا
وهو يعود للشيشة ) هى الناس
جرلها إيه – لا حول ولا قوة
شاب – 4 كل واحد فينا شايل هم أكبر من
التانى
المجموعة آه وآهين
شاب – 1 شغل ومش شغالين
المجموعة آه وآهين
شاب – 2 هدمة ومش لابسين
المجموعة آه وآهين
شاب - 3 لقمة ومش لاقيين
المجموعة آه وآهين
فتاة – 1 فرحة ومحرومين
المجموعة آه وآهين
فتاة – 2 سكن ومش محصلين
المجموعة آه وآهين
شاب - 1 حتى العلاج
المجموعة ( ترتفع صرخات المجموعة )
سيد ( يظهر عليه تغيير مزاجه فيتوجه نحو الجميع بزهق ) ياللا ياللا يا خويا أنت وهى – شوفوا لكم حتة تانية – عيطوا على خيبتكم فيها ياللا – ياللا – هى نقصاكم – كتكم البلا – لا لقيين شغل ولا سكن ولا لقمة ولا علاج – ما تروحوا تحاكموا الفقر اللي زى وشكم - ولٌا المرض أللي كلكم – يا جهله - ياللا غوروا فى داهية – الموت فيكم حلال – ياللا يا خويا أنت وهي
المجموعة أ ( يبدأ الجميع فى الخروج من المسرح وهم يرددون بصوت أنين - هامنج )
سيد يا ساتر – إيه وجع الدماغ ده – كل ما الواحد عايز يتكيف – يطلعوله شوية صيع يعكننوا عليه مزاجه ( يجلس ويبدأ فى شرب الشيشة – نسمع رنين تليفون سيد – سيد يخرج الموبايل ويتحدث ) أيوه يا رمزي باشا – خدامك سيد
ص رمزي مبروك يا بو السيد
سيد الله يبارك فيك يا مغرقنا فى خيرك – بس مبروك على إيه يا سعادة الباشا
ص رمزي جبت لك الرخصة أللي أنت عايزها
سيد ما ننحرمش منك يا وش الخير والسعد كله – بقول لك يا سعادة الباشا – العيال وأمهم بيبوسوا أيديك – ونفسهم يطلبوا من سعادتك طلب صغير كده وربنا يخليك لنا يا باشا
ص رمزي إيه يا سيد عايزين إيه العيال ؟
سيد عايزين حتة أرض نبنيها بيت أتلم فيه أنا والعيال بدل ما نفضل ساكنين كده ونتنقل من شقة لشقة – ربنا يخليك لنا يا باشا
ص رمزي حاضر يا سيدى – علشان خاطر عيالك – ها أجيب لك حتة أرض ومرخصة مباني كمان
سيد 2000 متر يا سعادة الباشا
ص رمزي 2000 متر
سيد بكرة العيال ها تكبر وكل واحد عايز يبنيله بيت لوحدة – ربنا يخليك للغلابة يا رمزي بيه
ص رمزي طيب يا سيد – مع السلامة دلوقتي
سيد ( يغلق التليفون ويقبله )
مصر ( تدخل المرأة بلهفة ) ولادى ولادى ( تنظر فى كل مكان ) ولادى - أنا لسة سمعاهم – صراخهم بيقطع فى قلبى – أنتم فين يا ولادى – نفسى أشوفكم – نفسى أخدكم فى حضنى نفسى أقول لكم مالكم – بتتوجعوا من إيه؟ – فيكم إيه؟ – عايزين إيه؟ ( بحرقة ) ما تفكروش إنى مرتاحة وأنا بعيد عنكم ، ما تفكروش إنى مش حاسة بيكم لاء – إذا كنتم أنتم بتتوجعوا أنى بتقطع من جوه جوايا – تعالوا- مشتاقة ضمة حضنكم – بدور عليكم من زمان بس أنتم أللى تايهين عنى – وانى من غيركم ما أبقاش حاجة – دا أنا طول عمرى عايشه بيكم وليكم – ولادى – ولادى ( تخرج )
سيد ( فى تعجب ) الله – هى إيه حكاية الست دى – باين عليها هربانة من مستشفى الخانكة
رمزى ( يدخل رمزى بك – ينادى بعظمة على سيد ) سيد – أنت يا سيد
سيد ( ينتفض سيد ويؤدى التحية )
رمزى بك – أتفضل يا باشا
رمزى أتفضل فين؟ أنت اتجننت
سيد طلباتك يا باشا – أأمر
رمزى أنا عايزك تخلٌى بالك كويس – الوضع محتاج تفتيح عين وودان – خليك جاهز أنت والرجالة فى أى وقت – سامع
سيد جاهزين يا باشا – أطلب تلاقى مليون فدائى
رمزى ( يخرج مبلغ ويعطية لسيد )
سيد ( يأخذ المبلغ ) خدامينك يا باشا – أى اخبار ها اتصل بسيادتك على طول
رمزى تتصل إيه يا متخلف أنت – أوعى تتصل بيا على التليفون – وأمسح الرقم بتاعى من عليه – أنا ها ابقى اتصل بيك - فاهم
سيد حاضر يا سعادة الباشا – طيب يعنى بس سعادتك لو عايز أقول لك أخبار يعني يا باشا ؟ لو حبيت أوصلها لسعادتك أبقي أعمل إيه سعادتك ؟
رمزى إيه خلاص – خلصت حيلك – أبقى أعمل نفسك عامل النظافة بتاع الشارع – أو أبقى أمسح العربية وانا بركبها يا غبي
سيد يا سلام – العلام سترة ومفهوميه
رمزى ( يخرج )
سيد ( يبدأ فى عد الفلوس ويعود إلى مكانه والشيشة )
( نسمع هتافات من الخارج )
كرامة حرية عدالة اجتماعية .. كرامة حرية عدالة اجتماعية
مصر ( تدخل المرأة فى حالة من الفرحة التى يحيطها الخوف ) ولادى – ولادى – سمعاهم – سمعاهم – بيقولوا كرامة حرية عدالة اجتماعية – أيوه – هم ولادى – أنا عارفة صوتهم – حاسة بيهم – محتاجين كرامة وحرية وعدالة اجتماعية
( تنظر حولها مع علوالهتافات ثم تخرج تبحث عنهم )
المجموعة أ ( تدخل وهى تهتف ) " كرامة حرية عدالة اجتماعية – كرامة حرية عدالة اجتماعية " ( سيد يستدعي بعض من أصحابة البلطجية يحملون شوم وأسلحة بيضاء وينقضون على مجموعة الشباب وتدور معهم معركة يسقط فيها شاب – 3 ارضا وينهال سيد وزملاءة عليه ضربا حتى يفارق الحياة ويعود سيد وزملائه مكان الشيشة – مجموعة الشباب أ يلتفون فى ذهول حول شاب 3 الذى فارق الحياة - سيد وزملائه يضحكون نسمع رنين تليفون سيد )
سيد أيوه يا سعادة الباشا - - - كله تمام يا باشا – ما تشغلش بالك بشوية العيال دُول – احنا خلاص – خلٌصنا عليهم - - - لاء لاء يا باشا – مش كلهم – واحد بس هو أللى مات – بس لو ركبوا دماغهم تانى – ها يبقى العدد فى الليمون – أوك يا باشا ربنا ما يحرمنا منك يا باشا – مع السلامة يا باشا
شاب – 1 ( يتفحص شاب – 3 ) دا مات بصحيح
فتاة – 1 ( وهى تصرخ ) مات ؟
( سيد وزملائه البلطجية يضحكون )
( نسمع هتافات من الخارج )
الشعب يريد إسقاط النظام ، الشعب يريد إسقاط النظام
( ثم تدخل مجموعة ب ويتضامنون مع مجموعة أ ويهتف الجميع )
الشعب يريد اسقاط النظام .. الشعب يريد إسقاط النظام
سيد ( فى ذهول ) يا ولاد الكلب – عايزين تقلبوا نظام الحكم
( نسمع رنين تليفون سيد )
أيوه يا رمزى بيه – شفت ولاد الكلب – عايزين يقلبوا نظام الحكم ـ ـ ـ ـ ـ ـ ـ ـ ـ حاضر يا رمزى بك – مش ها نخليهم يعرفوا يقولوا آه – بس نفسك معانا يا رمزى بك ـ ـ ـ ـ ـ ـ ـ ـ ماشى يا باشا ربنا ما يحرمنا منك ولا من نفحاتك يا باشا
( ينظر إلى زملائه بحماس ) جاهزين يا رجالة
البلطجية ( وهم يشهرون أسلحتهم فى استعراض للقوة ) جاهزين يا ريس
سيد ( ينتفض من كلمة ريس ) ريس إيه الله يخرب بيتكم – أنتم مش سامعين – دا عايزين يقلبوا الريس نفسه ( يرفع زراعية عاليا وكأن يحضن الرئيس بين ذراعيه ) الريس يا عوله - أهجم ياوله ( يهجم سيد وزملائه على المجموعة أ و ب ) أضرب يا واله
( يدخل الجميع فى معركة فيما بينهم فتنقض المجموعتان على سيد وزملائه بالطرب حتى يضطر سيد وزملائه للهرب ويخرجون - تبدأ المجموعتان أ و ب فى إحكام مداخل المسرح مع استمرار الهتاف )
الشعب يريد إسقاط النظام – الشعب يريد إسقاط النظام
صوت ( نسمع صوت من الخارج يعلن نبأ تنحي الرئيس )
( تدخل المرأة التى تمثل مصر وهى ترتدى جلباب على شكل علم مصر وتظهر فى صورة صبية جميلة وهى فى سعادة تامة وتقف وتحت قدميها يرقد الشهيد تنحنى له ثم تملس على رأسه ثم تقف مرة آخرى )
مصر ولادى – حبايبى – دلوقتى لقيتكم – دلوقتى شفتكم
( يبدأ المجموعتان أ و ب فى الجلوس على ركبة ونصف منفصلين على يمين ويسار الجمهور - ترفع المجموعة التى على يمين الجمهور يدها اليمين باتجاه المرأة والمجموعة التى على يسار
الجمهور ترفع يدها اليسار باتجاهها )
حبايبى ولادى – كنت حاسة بيكم – كنت بدور عليكم وعارفة أنى ها الاقيكم – أحمدك يا رب
( لحظات ثم نرى شاب -1 يحاول أن يقف بجوار المرأة التى تمثل مصر فينهض شاب - 2 ويبعد شاب – 1 ويقف هو بجوار المرأة ثم يتقدم رجل - 1 ويزيح حسين ويقف هو بجوار المرأة ثم يقف رجل – 4 ويزيح رجل – 1 ويقف بجوار المرأة – وكأنه صراع بينهم فيمن يتمكن من الوقوف بجوارها ثم نشاهد تأثير الحزن والألم وخيبة الأمل على المرأة من جراء هذا الصراع الذى وقع بين أبنائها فتصرخ فيهم جميعا )
لاء – لاء – أنا بقالي زمان بدور عليكم – بقالي زمان محرومة منكم – بقالي زمان وانا عايشة لوحدى - لا حد حاسس بيا ولا حد بيفتكرنى – ويوم ما ألقاكم وافرح بيكم وارفع راسى – عايزين تدوسوا على تاريخي وتحرمونى من فرحة احساسى – لاء – دا أنا ما صدقت لقيتكم – دا أنا رجعت نص عمرى ولقيت فرحتى فيكم – واخرتها عايزين تقفوا لبعض - لاء وألف لاء – عايزاكم زى ما نا شفتكم - أيد واحدة ، قلب واحد – مين يقف جنبى مش مهم – المهم أنكم تحبوا بعض علشان لو حبيتوا بعض ها تخافوا على بعض ولو خفتوا على بعض ها تبقوا روح واحده – عيزاكم زي ما أنتم
( مصر تلمس بيديها على رأسهم )
حبوا بعض – احترموا بعض – خافوا على بعض – ساعتها ها افضل زي ما أنتم عايزين المحروسة - رافعة راسى لفوق – أنتم عملتوا أللى كنت مستنياه من زمان – أنتم ولادى – كل واحد فيكم هو أنا – أنا بيكم ها اعيش وأفضل بين الصبايا أحلاهم ، وبين الأمم أغلاهم حبوا بعض
( يبدأ المتصارعون فى العناق فيما بينهم فى تسامح ومحبة – تخطو المرأة بثقة وهى تبتسم نحو الجمهور )
حبوا بعض – خافوا على بعض – ها تفضلوا طول عمركم كبار والكل يعمل لكم ألف حساب
هي دي مصر
( تبدأ فى الخروج وهى تردد )
مصر حبوا بعض خافوا على بعض
( ثم نرى الجميع يسيرون
خلفها ويرفعوا ايديهم تلبية
لكلامها وهم يحملون شاب 3 الشهيد - حتى يخرج الجميع ــ ثم يدخل سيد وهو يتحدث فى التليفون ومعه مجموعة البلطجية يحملون بعض من الأسلحة البيضاء والعصي وبعض الزجاجات والحجارة )
سيد حاضر – حاضر يا باشا ، بس الموضوع كده ها تبقي الفيزيته بتاعته عاليه قوى يا باشا ـ ـ ـ ـ ـ ـ ـ ـ ـ ـ ربنا يخليك لنا يا باشا ـ ـ ـ ـ ـ ـ ـ ـ ـ ـ الأمل فيكم أنتم يا باشا – أوك يا باشا
( سيد يغلق التليفون )
بلطجى 1 العمل يا معلم
سيد العمل عمل ربنا
بلطجي 2 أيوه يعنى ها نعمل إيه دلوقي
سيد تعليمات جديدة ( الكل ينتبه )
بلطجي 3 قول يا أبو المفهومية
سيد طبعا مش ها نقدر عليهم طول ما هم مع بعض كده إيد واحدة
بلطجي 4 وبعدين يا مخ
سيد لازم نفرقهم عن بعض
بلطجي 5 إزاي يعني يا كومنده ؟
سيد نفقع أسافين بينهم
بلطجي 1 وإحنا نقدر على كده يا معلم
سيد لاء – ما هو مش لوحدنا
بلطجي 2 آُمٌال يا كتش
سيد الباشا الكبير وأللي معاه ها يعملوا اللازم
بلطجي 3 آُمٌال إحنا ها نعمل إيه يا فرمان ؟ إحنا ها نتبعهم ونراقبهم كويس
بلطجي 4 يعنى نرجع لدورجية زي زمان
سيد لغاية لما يتفرقوا – وبعدين نهجم على كل مجموعة لوحدها – وبكده يبقي الخلاص منهم سهل
بلطجي 5 تصدق يا كوتش أنك معلم
( سيد ينظر يمينا ويسارا بتمعن ثم يتبعه الجميع فى النظر - ثم يخرجون من نفس مكان خروج الثوار وهم يهتفون )
سيد تحيا مصر
البلطجية تحيا مصر
سيد تحيا الشهيد
البلطجية تحيا الشهيد
ـ ـ ـ إظلام ـ ـ ـ
*كاتب ومخرج مسرحي (منشية أبو النجا بلبيس شرقية)
ليست هناك تعليقات:
إرسال تعليق