إلى دلال المغربى
محمود مرعى / الأقصر
يا دلال
وانت راجعه
جسم خالى م الحياه
قولتى آه؟
عذبينا
وافضحى خضوعنا وزيفنا
انزفينا
بس خايف
اننا ندنس جروحك
جوا روحك
طهر خام
واللئام كسّروا
روحنا البريئة
كام حقيقة اتزيفت
واتحرفت
واتبدلت فينا لمكيدة
*********
يا دلال
وانتِ بين
عزف الرصاص
وانكشافات الحقايق
كنتِ حاسة
إن فيه بينك وبين
قلبك خصام
إن لغة الكون بتصدق
ولا كدابه بتبرق
والبطوله فعل
مش حبة كلام
*********
يا دلال
وانتِ بتضحى بشبابك
وانتِ بتشدى حضورك
من غيابك
كنتِ حاسه
بانعكاسات الخداع
إن دمك
سلعه فى ايدن الجياع
***********
يا دلال
لما جفيتى العشق
واحلام الصبايا
وتبعترت
روحك نجوم
ليه صار مكانا
فى طوابير البغايا
وتأصلت
فينا الهموم
*********
يا دلال
جحدت قلوبنا
تنكرت
ووقفنا بين كل الطرق
بنبيع رفاتك
وشطبنا من كل النتايج
يوم وفاتك
وتلونت ضاميرنا
بالوان الحداد.
24/3/2012
دلال المغربى، شهيدة فلسطين
بطلة عملية الساحل.
ليست هناك تعليقات:
إرسال تعليق