شمس العبيد
منتصر سلطان محمد /أسوان
شمس العبيد متدفنيش
و لا حرضى يوم ..
تحت منها اعيش
عساكركم متهمنيش
بنادقكم متهمنيش
صلاتكم ف الجوامع ..
متهمنيش
دستوركم
دقونكم متهمنيش
طول ما انا مش لاقى
لقمة
للبطون الجعانة
طول ما العيال ف
الشوارع
بتداس تحت جزم
المهانة
طول ما مصر تايهة
و غرقانة ف بحور
العفانة
شمس العبيد متدفنيش
و لا حسمى نورها ضى
و لا حسمح لها
تلمس وش حى
ولا تلمس تراب
الحوارى
طول ما لساه مصر
بتتعامل
زى الجوارى
شمس العبيد متدفنيش
و رافضك يا وطن
عايش عوالة
و نهضتك حبر ف ورق
معدتش حدود القوالة
و الجوع بينهش جتتى
و مصر مصرة تعزق
فدان سفالة
يطرح عساكر
متسلحين بالندالة
يكسروا انف اللى صوته
يعلى
بالهتاف
و يجوزوها سر
و يتم الزفاف
و اما نسأل مصر فين
يقولك كلوها السبع
العجاف
يا ريته صوتى
ما كان عشق .. طعم
الهتاف
و يا ريتك ياقلم
ما عشقت العفاف
شمس العبيد متدفنيش
دى الحرة من عرق
الوراك
ترفض تعيش
و انت يا بهية يا
ابية
قولتى : يللا خلينى
اعيش
و هيه تبقى عيشة .. ؟
لما شمسك متدفنيش
و ابقى عايش على خط
العفن و السل
طافح كحتى بالدم
و انا كل همى ضحكتك
و فديتك ف الميدان
بالدم
لما كان الجوع بينهش
جتتك و الهم
شمس الذل غرقت ف بحر
الدم
ايه رجعها من تانى
تشق صدر الموت
ترعش ضلوعى فوق قلوع
الخوف
الاقى شمس العبيد
فارشالى سكتها
اطاوعها ازاى وانا
الرافض
ف حبك ابقى جبان
رافض لكنى جعان
اموت ولا انى اعيش
شمس العبيد متدفنيش
وانت مكسورة
هما اللى بانوا
واحنا اللى اختفينا م
الصورة
ليست هناك تعليقات:
إرسال تعليق