لأول مرة من سنين
خيري عبدالعزيز
لأول مرة من سنين
مصر تاني بتناديك
قوم يا مصري نصري دين واجب عليك
وحشني صوتك
وبأعلي صوتك بوح لي شجونك
وحشتني لهفة الحنين
فاكر السنين..
الليل .. والناس الطيبين السامرين
والقمر نعسان علي صفحة النيل متعانقين
والموج الحنين شايل ضيه بيتسامي لشط النخيل
يحضن جذوره ويبوسها في حب وأنين
فيهز النخل طوله من الفرح
ويرمي له الرطب عناقيد متغندرين
ومصر هجعة مستنظرة الفجر الوليد
يدن الديك تنتفض
تزرع وتقلع وبعلو حسها تتغني بالنشيد
" قوم يا مصري مصر دايما بتناديك .. خد
بنصري نصري دين واجب عليك "
هنردده من النهاردة بشكل تاني ..
" قوم يا مصري مصر تاني بتناديك
خد
بايدي ابني مجدك ان كنت غالية عليك "
أيوه هبني وعوضك قحط السنين
الي عيشناها متغربين
ومتخافيش أنا مش هحيد تاني عن عنيكي
ومش هسمح لحد يبعد إيديا عن إيديكي
وهشق نصين كل إلي يمس طيفك
وهقطع ايد كل الي يمدها لخيرك
أو ياكل قوت الناس الغلبانين..
المطحونين..
احنا كنا مطحونين
ولادك السمر المتعافين كانوا مطحونين
كانوا مرضانين
شفتي السنين..
والهم الي كنا فيه غرقانين
بس راحت الغمة خلاص متحزنيش
والخاينين ورا القضبان متكلبيشين
بياكلوا عيش وحلاوة..
وفي حضن الفيران دفيانين
وارضك الي باعوها اهيا
ضميها لصدرك وشمي ريحة طميها ودمك
اصل ألف عواد ما اتكسفوا يوم ما باعوا أرضك
نفسي أعرف بصوا ازاي في عيون نسوانهم يوم ما
باعوكي
وهم باعوهم يوم ما باعوكي
ازاي فرطوا في الامانة وبقوا خاينين
دا انتي بتخلدي ذكر ولدك الي بيحافظ عليك
وعمرك ما كنتي ناكرة للجميل
خلدتي احمس لما وحدك
وتحتمس لما حررك
وعرابي لما حارب الانجليز
والمملوك لما حماكي من المغول
خلدتي ذكره
واتكتب قطز في صفحتك من أشجع الفرسان
امال الوضاعة دي ازاي في دمهم
اتعلموها منين وبقت من طبعهم
هما اكيد مش من صلبك
ولا من ولدك
وعشان كده راح نجازيهم
بالظبط زي التاريخ مبيجازي الحثاله
بيرميهم في أقرب صندوق زبالة
واحنا التاريخ ..
وهنحطهم من راسهم في أعفن صندوق زبالة
وده مصير كل الي ميحافظ عليكي
ننسي ذكره ومنطقشي سرته
ومن النهارده مش هنقول غير النشيد
أصل احنا ردت لنا صحتنا وعفتنا
والنشيد ميقلوش غير الرجالة الشداد المتعافين
وهنرفع التراب عن مجدك
ونبني غدك..
ويرفرف علمك..
ونحط تاج علي جبينك ليوم الدين
ليست هناك تعليقات:
إرسال تعليق