مرار كاسى
محمد عبدالرازق زهيري
منين ماتشوفينى
عنيكى تنادينى
وتعتب عليه
برغم انى باصرخ
باعلى مافيه
ولاتهونش صورتك
تغيب عن عنيه
فايه الحكايه ؟
يازايده القساوه
***
شبابك عذابى
مضلم عنيكى
ومش قادره تعرف
حقيقة ملامحى
ومش قادره تمحى
اهتزاز المناظر
وحيرة مشاعرى
فى ساعة وصالك
لانى يالايمه
جريح الشعور
ورغم المخاطر
وكتر الجحور
عشانك باعافر
واصون الوداد
وطبعى الحقيقى
صلابه وعناد
مااطيقش البعاد
وارفض اساوم
مع المغرضين
لانى بحبك
بكل اللى فيه
ويكفى اللى بيه
ياست الحنين
لانك يقينى
وبحرى وسفينى
فى ريح الغضب
وعقدة جبينى
فى عز التعب
ونظرة عتابك
مشارط الم
وضربه قويه
بفاس الغشم
وقلبى يفرفط
وتصرخ اهاته
واطوى بشوقك
سنين التمنى
وحبى يخايلنى
واشعر بانى
كضلك وتايه
وعزمك وصابر
وعطفك وجابر
خواطر ولادك
وحافظ ودادك
ونومى عوافى
وغطوة لحافى
حدودها الكفاف
وبانده صباحك
وطاعتك ولائى
واطلب رضاكى
واعيش انتمائى
بشعرى المداوى
هموم الحزانى
وميلة زمان الاسى
ع الغلابا
ولاد الكفور والعزب
والنجوع
ومن فرط حبى
اصلى بخشوع
واخاف اى مؤمن
تهزه الدموع
ولايزل يوم الفزع
عن مبادئك
واثبت ملامحك
فى مخ الفراغ
واوزن دماغ اللى
ع البر عايم
وارد اللى لايم
قتيل الغرام
واشرحله كيف
الشهامه الحقيقى
واشده لطريقى
واقوله عليكى
الكلام الصحيح
وازيل عن ملامحك
زواق المعانى
وعهر الاغانى
اللى فاسده الشباب
***
وقلبى اللى شارب
هوايل غرامك
بيركع امامك
ورغم الملامه
وكاس المرار
يصلى احترام
لام المعانى
العظام والكلام
ومنى اليكى
ياغاليه السلام
ليست هناك تعليقات:
إرسال تعليق