على رصيف مصر ...!!!
شعر: السيد طه
قاعد مقرفص ع الرصيف ...
مستنى إيه ..؟؟ مستنى مين ..؟؟
مستنى حسنه أو رغيف .....
زى الغلابه المحتاجين ...؟؟!!!
سيبينى قاعد ع الرصيف ...
المشكله مش ف الرغيف ...
ولا إن جيبي م الفلوس ....
خـــــــالى ونضيــــــف ....
ولا عمر كان عزمى ضعيـــف ..
ولا ببص للفقير ....ولا للغنى ...
ولا ليّ حزب...ولا لجماعه بنتمى ...
مشغول بنفسي ....
في ضل حيطى بحتمى ....
ولا ثورجى ولا بلطجى.....
ولا فلسفي ...ولا منهجى ...
ولا م الشمال ...ولا م اليمين ...
ولا ليّ ف التور ولا ف الطحين ...
بين البينين شارد حزين ...
إن جيت كده قالوا معارض ....
أو مناهض جاى يقطع فروتك ......
وإن جيت كده قالوا ده صلى ...
وقام يفرق وحدتك ....!!!
وإن جيت كده قالوا منافق ....
أو موافق إنه يمشي ف زفتك .....
ما بقتش فاهم حضرتك ...!!!
أنا ابن بطنك ولا ابن ضرتك !!!..؟؟؟
ولا ابن مــــــين ؟؟؟...
بين البينين واقف سنين ....
واقف على البسطه انتباه ....
ولا مره غلطت وقلت لأ....
ولا مره حتى قلت ...اه....
بين البينين ....
واقف كده .....
وسط القطيع ....
خروف مطيع .....
عمرى يضيع ......
والنشره في الراديو تذيع ....
دعم ....الرغيف ....
والمشكله مش ف الرغيف....
المشكله مش ف الرغيف.....
سيبينى قاعد ع الرصيف ....!!!!
ليست هناك تعليقات:
إرسال تعليق