يهل الفجر
شعر:أميرة الوصيف
ويفرح طيري و يزقزق
لغنوة فجر !
لرنة شمس بالخلخال !
لتنهيدة كسفها الفرح
وباتت ذكرى منسية
وكلمة فى مطلع الموال !!
يهل الفجر وينادى عليا
" اجرى "
تعالى يا حلم مطَوَح على الثورة !
يانور بُكره
ياقصة حب بتدندن على الفكره
وأبطالها وشوش فى حيطان !
يهل الفجر مرفوع الهامات والعين
ويدبح فِديه للمساجين
ومظاليم الكفاح والحبس !
ويرفض تار ما بين اتنين
عزول بينهم ده كان ريس !!
يهل الفجر ويميل على كتفي
يطبطبلى عليه بحنان
ويبدلى مخاوفي أمان
ويحلفلى براس الشمس والاوطان
بإن الحلم مايموتشي
وإن الثورة خير ضمان !
وان الفجر مايجيشي بجانب كهنة السلطان !!
" يهل الفجر ويشقشق
ويفرح طيري و يزقزق
لغنوة فجر !
ليست هناك تعليقات:
إرسال تعليق