" أم الشهيد " لوحة غنائية 2003 م
ــــــــــــــــــــ
الشمس تشرق كل يوم و تغيب
و الأرض تطرح من نداها الطيب
و انتى الحبيبة و ام كل حبيب
قلبك علامة للوطن و أمان
و عنيكى بحر و شط نور و حنان
يا ام الشهيد
يا شمس طالعة كل يوم ما تغيب
......
يا زهرة الصبّار مدد .. يا ام الشهيد
دمعك على خدك عدد .. و ما هوش عديد
......
يا ام الشهيد .. يا نخلة طارحة ع الحدود
يا شهيدة الحق القوى
ما يهزكيش صوت البارود
صوت البارود ما هوش قوى
أنتى القوية .. يا قوية .. اتحملى
يا ام الشهيد
......
يا ام الشهيد صوتك عنيد
صوتك وطن يا ام الوطن
يا زهرة الصبار يا صابرة .. اتأملى
قرب خلاص .. يوم الخلاص
و انتى اللى قادرة تكملى
يا ام الشهيد
.......
يا ام الشهيد ... و انتى بتتهجى النشيد
ف خيوط علم لما العلم .... لف الشهيد
عدينى فى خيوط العلم ... خيط من ألم
عدينى ف حروف النشيد ... حرفين نغم
عدينى صرخة فى العدم ... تفنى العدم
يا ام الشهيد
.......
ــ غاب الشهيد
ــ رايح يجيب توبه الجديد
ــ غاب الشهيد
ــ رايح يجيب لبلدنا رغم الحزن عيد
لكنه حاضر فى الغياب
يفتح لنا فى السكة باب
يفتح لنا سكة نهار
دمه علم .. روحه منار
و يلمنا .. ف عمره الجديد
غاب الشهيد .......... عاش الشهيد
.......
يا ام الشهيد
انتى اللى قادرة فى الجحيم تتجددى
و انتى اللى قادرة تجمعينا
ف ليلة العيد الكبير و تعيدى
يا زهرة الصبار يا صابرة تأملى
قرب خلاص .. يوم الخلاص
و انتى اللى قادرة تكملى
يا ام الشهيد
...........
يا زهرة الصبار مدد .. يا ام الشهيد
دمعك على خدك عدد .. و ما هوش عديد
ليست هناك تعليقات:
إرسال تعليق