أبويا الصنايعي
رانيا مسعود
**
إيديك
اللي باشت من الميَّة ديَّ
ورُقْعَة ف هدومك
وبُقعَة ف يمينك
وصندل مداري لشق ف كعوبك
وبسمة مداريَّة علينا تخبِّي
عينيك اللي صاحية
من النجمة تجري
بتطلب ف لُقمة
وكلمة تحيَّة
ما تِكفِي كفاحَك
وترسِم براحَك ف آخر نهارَك
وعرقك تصبَّب
وجاي من جبينك
وتختِم تبارِك
وتشكر ف ربَّك ببوسة إيديك
ورَفْعِة عينيك لفوق ف
العلالي
تناجي اللي رزَقَك
يكتَّر ف رزقك
ويملا ف جيوبَك
وتبدأ ف يومَك
تبوش الإيدين
وتستنَّى تاني
ف آخر نهارَك
بوقفة تبارِك
تبوس اليمين
وتنظر لربَّك
ما يقطع ف عادتَّك
وتِكمَل سعادتك بشوفة ولادك
دا بالهمة ظابط بيحرس جنابَك
وعنتر زمانك بقى اسمه طبيب
يا قلبك يا طيِّب
وبالطيبة شيِّب
مدارس جوامع
ما بالعقل غيِّب
مآذن صوامع
وعامل مصانع
وفلَّاح ف غيطك
ويستر طريقك
يا صاحي بمزاجك
وم الفجر شقشق
وطالع تروَّق
مزاج الإيدين
وتصنع ف كرسي
وشمسية تكسي
جناب السفير اللي ساكن ف
روكسي
واسمك صنايعي وحالك ملوك
لا تطلب علاوة ولا تشوف بنوك
وصابر لرزقك
وراضي بنصيبَك
وحافظ كرامتك
وصاين ضميرك
لا عمرك تطاطي
ولا إيديك تهاتي
وتشحت يوماتي
رغيف حد غيرك
توكالك على الله
وبالهمة ياللا
ما تخلف وعود
ورزقَك من الله
الكريم الودود
وفطران بمِشَّك
وحامِد لربَّك
على النعمة صاينة ف كرامة
سعادتك
سعادة جنابي
ما تِكمل بغيرَك
تكون من نصيبي بناتك تِرَبِّي
ولادي تِكَبَّر
وتحفظ لي بيت
يا بنت الصنايعي
يا تاج الرؤوس
وصنعة أبوها
بتعطي الدروس
تَرَبِّتْ عزيزة
كريمة
أبِيَّة
بتحصد جوايز ودِرع وكؤوس
ولو تسمحي لي أقبِّل إيدين
اللي كبَّر وربَّى
وحرس الجبين
وأنزل واطاطي براسي العزيزة
واقبِّل وابوس
ما غيرك هابوس
الإيدين اللي باشِت
ورَبِّت نفوس
حلالك يِهَنِّي
وحالك يِغَنِّي
ما دمت بضميرك
ما همَّك ف غيرك
يِحَقَّر إيديك
ويسرق ف قوتك
ما بَص بعينيك الجميلة اللي
كانت
بتِدبَل يوماتي
وقايم تهاتي
من الفجر تصحا
وتسجد لربك
كده ف ركعتين
حلالك حلالي
وهمَّك ف بالي
ويِسعِد نهارَك
وجاري وجارَك
صنايعي دؤوب
أبويا الصنايعي
يا فخري بكفاحَك
وعِز بضميرَك
نجاحي بنجاحَك
يميني بيمينك
أمِد ف يومينَك
ويكسر قلوب
نفوسهم بغيضة
وعالية وأليطة
وفيها العيوب
وشايفاك تعِيبني
وانتَ مناسِبني
وعيشتي الملوك
ضميرك دا صاحي
وصاين كفاحي
وتاج الجبين
أشيلك ف عيني
واسدِّد ف دِيني
وابوس الإيدين
ما يحفظ لي قيمتك
ويحفظ كرامتك
غير الشاب راعي
وحافظ لدين
يصونك
يصونِّي
يراعِي لي هِيبتَك
ما يِكسَر لي عين
يا حظ اللي علِّم
يا حظ اللي هَنِّن
وربَّى البنات
وخَلِّف ما مات
هايفضل جِمِيلُه
وف العين أشيله
واغنِّي بثبات
يا بوشة إيديك
وتشقيق كعوبك
ووقفة نهارك
وليلك تبات
ما يكفيني كلمة
ولا تروق لي جملة
ولا ارمش بعين
تحية تصونك
وتحفظ مقامك
يا تاج ع الجبين
ليست هناك تعليقات:
إرسال تعليق