خالد بيومي يكتب: مسلم و مسيحي ايد واحده .. بس مبتسقفش .. بتدي باللكمية

مسلم و مسيحي ايد واحده .. بس مبتسقفش .. بتدي باللكمية

خالد بيومي فهمي

في أحداث ماسبيرو الأخيرة هتف البعض أن :الفتنة نائمة لعن الله من أيقظها

وفي عز الضرب والدم لما كان للركب كتب الكثيرون أن : الفتنة نائمة لعن الله من أيقظها

وعلى الفيس بوك كتب الفرندز المحترمين – برضه - أن : الفتنة نائمة لعن الله من أيقظها

و أنا مش عارف بصراحه ليه الناس مصممة إن "الفتنة نائمة" .. يا جماعه ده أنا من ساعة ما وعيت عالدنيا و أنا شايفها صاحية ومفنجلة عينيها 24 ساعه قدام التليفزيون والنت و عماله تهري في المسيحي ، وتنكت في المسلم ، وتضايق في العسكري ، وتسخن في أقباط المهجر ، و تبعت صور متفبركة و كلام يحرق الدم عشان تولع الدنيا و تشعللها وهي تبقى مزأططه ومتمزجه آخر مزاج

وأنا أعتقد أن سيناريو الفتنة بيكرر نفسه – وهيفضل يتكرر - لأنه للأسف مفيش حل موضوعي للمشكله .. الإعلام دافن راسه في التراب وبيخدرنا بكلام انشا عن الوحدة الوطنية والتعايش و فيديوهات التسامح عن اسحق اللي انقذ محمد من الموت ، و عمرو اللي خلا الكهربا بتاعت عمود النور تمسك في جتته بدل مايكل .. و عن زيارة عمرو موسى الساذجة – والتي ليست على مستوى الحدث - لكاتدرائية العباسية وكأنه رايح ملجأ أيتام .. و عن حلقة مني الشاذلي اللي متخيلة أن كوباية العصير هي اللي هتحل المشكله ما بين القس سمعان والشيخ محمدين واللي بيقسموا - بعد ما يشربوها - بيمت ايمان انه كله بــيــس يا ست الكل وتمام ومفيش مشاكل خالص

ولكن

ولكن اللي في القلب في القلب .. و الكلام بدل ما يبقى في صميم المشكله بقى حواليها .. ونتايجه للأسف عكسية .. فكر معايا هتلاقي أنه كتر الكلام عن "التعايش" بقي بيحسس اللي قدامك أنه فيه فعلاً مشكله عندك في التعايش (على طريقة اللي على راسه بطحه) .. و كتر الأغاني و وكتر الرموز والشعارات بقى بيعكس من الناحية الأخرى إن الدنيا والعه أساساً وأن أغانيك ورموزك وشعاراتك ما هي إلا تغطية منمقة للي بيحصل دون حل حقيقي لها .. كل مشكله بقى قصادها أوبريت رخيص بيفكر الناس بدل ما ينسيها .. و كل جثه لازم يداريها رمز جديد وشعار ظريف يزغلل عين اللي شايفها ويحاوط عالدم السايل من كل حته .. لكن مفيش حل موضوعي ولا نقاش على أي مستوى..

و أنيس منصور – كاتبنا العظيم - قالك "ايد لوحدها متسقفش .. لكن ممكن تدي باللكمية" .. ومن هذا المنطلق أعتقد أنه علينا التفكير في شعار "مسلم ومسيحي ايد واحده" .. لأن اللكميات كترت قوي والدم بقى للركب .. ومش عارف احنا ليه وصلنا لهذه الدرجة من صعوبة تقبل بعضنا الآخر؟! .. أنا أعرف أن الهند فيها اكتر من 1000 ديانه وطائفة .. هندوس بيعبدوا البقر ، ووثنيين بيعبدوا النار ، وبوذيين بيعبدوا بوذا ، وكونفوشيوسيون بيقدسوا الفيلسوف القديم كونفوشيوس وطبعاً مسيحيين ومسلمين .. محصلتش في الهند مرة كمية الدم اللي بنشوفها كل كام شهر عندنا دي .. يمكن مرة واحده في سنة من السنين حصلت مدبحه بين المسلمين والهندوس وسالت أنهار من الدم .. و لكن الناس العاقلة قعدت ولحقت الموضوع .. ليه ؟؟.. مش عشان دي الهند يا جماعة (أم الدنيا) .. ومش عشان دي الهند (يعني الصبح بدري) .. ومش عشان دي الهند يعني جدو ماسك في ايدو حفيدو رايحين يشوفوا فيلم اميتاب تشان الجديد .. لأ .. عشان حاجه واحده .. عشان دي بلدنا و ارواح بتموت ولو معشناش مع بعض بالرضا هنعيش بالغصب واحنا الخسرانين

و لما قعدت أفكر شويه - وأنا تفكيري عموماً في المشاكل الاجتماعية والسياسية ضعيف بعض الشيء لكن بحب أأقرف اللي قدامي طالما عندي صفحة عالفيس بوك - لقيت انه السبب الأوحد ورا مشاكلنا والفتن اللي بنعاني منها هو اننا – كمصريين – مبقناش نحب بعض زي زمان .. جوانا طول الوقت كراهية و غضب ومقت واحتقان ولا توجد قناة شرعية لتفريغ هذه الشحنات الرهيبة .. ولو مش مصدقني انزل الشارع .. آهو الشارع ده ماكيت صغير لأي فتنه من الفتن اللي أنت بتشوفها .. اتفرج على لهاث الناس الجنوني والتشليت اللي بيشلتوه لبعض وكأن كل واحد فيهم بيزايد على التاني في أهمية وقدسية ما يفعله .. اتفرج على "الأنا" اللي بقت عند كل واحد عايز مصلحته تبقى هي الأهم والأسرع من مصلحة الآخر .. ولو حصل أن "الأنا" بتاعتي تتفق رؤيتها مع "الأنا" بتاعتك ممكن نتجمع سوا ونعمل احتجاج أو اعتصام ننول بيه المراد ومفيش مانع اتخلى عنك في النص طالما حد هيحقق لي مرادي بحذافيره دون تقديم تنازلات لزوم اعتصام سعادتك .. طب اتفرج على التحرش والمعاكسات .. وهاتلي بنت عارفه تمشي في حالها من غير ما تلاقي محافظة ماشية وراها .. اتفرج على سب الدين ، و النفسنه ، والحقد ، و جر الشكل اللي بقى في كل مكان .. هتعرف أنا بقول ايه .. طب الكبت والغضب ده كله بيطلع فين ؟؟ .. اتفرج على ماتشات الكوره وقولي كده كام مرة في الشهور الاخرانية الجمهور ساب المدرجات ونزل أرض الملعب وحدف ازايز وحجارة ومولوتوف وقد ايه عدد الاصابات .. ده كان بيحصل زمان ؟؟ معتقدش .. الغضب والكره والمقت اللي جوه النفوس محتاج بس شرارة .. ومفيش أحلى ولا "أسرع" من شرارة الدين .. دي اسرع من الكورة و أكثر قدسية من اللهاث ورا الميكروباصات .. هو الواحد بس يستني خبر صغير .. خبر كده عن مسيحي عدى من جنب جامع .. أو كنيسه مش عايزة يتبني ليها دور خدمات ... أو دار مناسبات ملحقة بمسجد قطعت فيها مرة واحده وأنا أشيط ولا حدش يعرف يوقفني .. وطبعاً بقيت السيناريو معروف

وأخيراً أذكر أنه من يمكن من خمس سنين - وقبل كل الأحداث دي - اتصل بيا أحد الأصدقاء من امبابة وقالي احنا عاملين اعتصام قدام الحي وعايزينك معانا .. سألته ليه ... قالي عشان مش عايزين يدونا قرار بتوسعة المسجد .. قلت له يمكن للحي أسبابه .. قالي مفيش أسباب هنوسع المسجد يعني هنوسع المسجد غصب عن المسيحيين .. طبعاً معرفتش ايه دخل المسيحيين بالموضوع و رحت بالفعل أشوف بس ايه اللي بيحصل ولقيت اعتصام رهيب جداً .. وبعد أيام صدر قرار من الحي - أو من المحافظة مش عارف - بتوسعة المسجد .. الغريب أنه مطلعش فيه مسيحيين في الموضوع ولا حاجه .. دي مجرد اشاعات لجمع أكبر عدد من المسلمين للاعتصام قدام الحي .. مهو لو قلتلك تعالي اعتصم عشان توسعة مسجد مش هتيجي .. انما لما قلتلك ده فيه مسيحي بيعند معانا ومش عايزنا نوسع المسجد اكيد هتيجي وتجيب عيلتك كلها .. واللي أكد لي الكلام ده أنه بعد ما المسجد اتعمل ملاقتش ولا حد من المعتصمين بيصلي فيه ...

بيتهيألي من القصة الصغيرة دي تعرف أنا عايز أقول ايه ...

وتوته توته فرغت الحدوته .. حلوة ولا ........ء

تمت بحمد الله

________________

أكتوبر 2011