إيه اللى حدفك ع الميدان؟
هيثم عبدربه السيد
وإيه بس اللى كان
حدفك ..
على الميدان تموت
مقتول ؟
ماتنطق قول !
رميت روحط ف ركب
الموت
تعافر فى سنابك خيل
وعامل فيها إيه ..
ثورى
وجاى تقطع ستار الليل
طب إيه بس اللى كان
حدفك
وليه قطعت توب أهلك
مش انت برضه كان
والدك
فلان الراضى بالقسمة
وبالمكتوب
وكانت حكمته دايما
" بلاش أبقى انا الغالب
وأحسن لى أبات مغلوب "
عرفنا عنه طيب روحه
لاعمره مرة هان روحه
ولامرة رفع عينه
وقال كلمة تخالفنا
تمللى كان سكوته بير
فكان صمته محالفنا
ودايما راضى بالمقسوم
وكان بيبوس إيديه
وينام
وبيكمل عشاه بالنوم
وكان ياكل فى طوب
الأرض
وكانت ملكه حته أرض
وجينا قلنا عايزينها
فى كام مشروع من
إياهم
عشان يعنى الوطن
والناس
فقال كلمة وفاكرينها
" إذا كان الوطن محتاج
فسد الحاجة سنة وفرض "
ولما كنا نختارله فى
مجلس شعبنا نايب
تمللى كان يصوت له ويدعيله
ولاعمره قال ده
ينفعنا وم ينفعناش
وبرضه كنا مش ننسى
ونديله
حاجات تقدر تقول عادى
شوية فكة يتشبرق
يجيب كوكا ويتروق
شوية لحمة مش هى
....لكن ببلاش
وكان بيصلى وبيدعى
" يخلى كل من أعطى
يبارك ربنا فيهم
وياخد منا يديهم
ومنع عنده يقويهم
حمول ياما وشايلينها
ومن غيرهم ولانسوى
ولاتصلب بلد حيلها "
وكان يدعى على الخونة
بتوع الفوضى
والفاضيين
بتوع تغيير نظان
الكون
فليه ماورثتش الملة ؟
وإيه بس اللى كان
جبرك
وإيه بس اللى كان
حدفك
على الميدان تموت
مقتول
ماتنطق قول
...........................
م عندك اخ متغرب
بقاله كام سنة عايش
ف أرض الله ومتسوح
وراضى وربنا حامد
لاعمره شذ او عاند
وفيه نخبط وبالجامد
ومن قوته ..
نمد ايدينا وبناخد
ويااللـــــــــــه على
كرمه
بنغرف منه ونعمر
جيوب السادة والعسكر
وكان يرضى وكان يشكر
ولاعمره فى مرة مل
ولامرة زهق او كل
ولاقال الكلام إياه
بتاع إخوانا إياهم
فليه ماورثتش الملة ؟
وإيه بس اللى كان
جبرك
وإيه بس اللى كان
حدفك
على الميدان تموت
مقتول
..................................
م عندك جارك الساكن
ف أول مبنى فى الشارع
شهادة كان ولد اّية
ولاعمره حفظ اّية
وكان كاجوال بحظاظة
ودلاية
لحد الفجر كان يسهر
ويضرب ماكس وبيسكر
وعنده صحبة كام مزة
مدام نانا على عزة
ولامرة سمع نشرة
ولاعمره اشترى جرنال
وبينا وبينه كات عشرة
بييجى يزورنا كام مرة
ويحكيلنا عن الأحوال
عن السادة بتوع الحق
واصحابه
وعن احلامهم المرسومة
جواهم
بان الدنيا حتمت يوم
هتتغير
شهادة كان ولد اّية
عيونه كانت الكاميرا
بتنقل صورة بعناية
وكانت ودنه ياللـــه ...تسمعنا دبيب النمل
وكان يرفض عطايانا
ولايقبل هدايانا
برغم بإنها كانت
حاجات يعنى ماتستاهل
فليه زيه ماكبرتش
وإيه تسوى بحور دمك
على الأسفلت مسفوكة
تعافر فى سنابك خيل
تقاوم فيها بجراءة
ومين اللى يحاسب خيل
ويمنع حكم ببراءة
براءة كل من داسك
وكتف حتى أنفاسك
فإيه بس اللى كان
حدفك
على الميدان تموت
مقتول
ماتنطق ...قول
ليست هناك تعليقات:
إرسال تعليق