مربعات شعرية
بقلم : علاء سعد حسن الدمرانى
-1-
افتكرى انى اللى كنت شايل همك ..
وعيونى الوحيدة .. اللى عليكى بكت .
وبين الحياة والموت ..
حتى أبوكى وأمك ..
مشفتش عيونهم عليكى بكت .
-2-
ياللى غرقت فى بحر هموم
وشطوط الأمل قدامك ..
ومش عارف تعدى لها.
قوى إيمانك بالله ..
وانسى همومك وابتسم ،
وبكرة حياتك كلها تعرف تعدلها.
-3-
ياللى ارتضيت باليأس ...
وسما حياتك أصبحت ...
كلها سحب سوده
كفاية ..
وأفتح الشبابيك لشمس الأمل ..
تقهر ظلامك ، وتنور الأوضه
-4-
ياللى ادعيت الشطارة ..
وبتزرع نبات الشر بإيدك
وقاعد بتروى فيه .
قوللى بقى يا شاطر ..
لما نباتك هيكبر
ومارد الشر من قمقمه يهرب ..
إزاى هتصرف فيه ؟ !
-5-
يا طير ياللى بتاكل النمل
ولا منه مليون واحده راح تكفيك ..
متنساش ان كله سلف ودين ..
ولما تموت اللى كنت بتاكله ..
برضه هياكل فيك .
-6-
ياللى اتجرعت كاس الظلم ..
ومن مرارتها ..
عيونك بالدمع اتندت .
ادعى ربك ..
وفكر كام من حصون للظلم ..
بدعوة صادقة اتهدت .
ليست هناك تعليقات:
إرسال تعليق