الدراويش
بقلم: خيري عبدالعزيز
اتجمعت عصابة
كبيرها شيخ منصر
حرامية نصابة والماضي متأصل
لبسوا الشيلان والسبح وعملوا فيها دراويش
وقالوا ننسي الماضي ونعيش بقي تفاريح
من النهارده خلاص معدناش خلاص سرقين
القرش هيجينا واحنا ملوك قاعدين
نحبك بس الدور ونعمل شيوخ عارفين
وبكرة يجي يوم نكون فيه سلاطين
نحكم ونتأمر ونكون فيه قادرين
قال كبير القوم لفوني بعباية
وادوني شال أبيض والعمة والسبحة
وقوموا ورايا قوام نتمشي ع الترعة
وقولوا زي ما أقول مدد يا أهل البيت
يا خضرة يا منورة احنا ع الطريق للبيت
قصدين ضياكي يا ست بس انتي بصلنا
إيدينا لك ممدوده بس انتي مدلنا
مدد يا أهل البيت يلي إنتو مقصدنا
لا غرضنا جاه ولا غني ولا حد غاصبنا
غير حبهم يا خلق قوموا إلبسوا المداس
إمشوا ورا خطانا وإكتموا الأنفاس
دا الخطوة ممدودة ولو فيه ميت ترباس
وعددت الخدعة وإنطلت ع الناس
وقالوا أسيدنا نحطهم ع الراس
وحلبت البقرة وناولهم الحراس
لحد ما في مرة قابلهم شاب حسيس
قال علي فين يا ناس يا صحاب البقر دايسين
قالوا ورا مشايخنا منين ما هم رايحين
رفع الغما عن عنيهم وقال كفاية حرام
انتم بشر مش غنم مانتوش يا ناس خرفان
دا اللبن في ضروعكم نشف والأرض خيرها راح
ضيعتم خير البلد في الجري ورا الدراويش
والكذب والفذلقه وهم شوية ألاديش
غرتكم العمة والجبة والقفطان
ومدد يا أهل البيت وشوية التهجيص
وهم حبة نور عصابة جربانة
يأكلوا مال النبي ويقولوا خسرانه
خسرانه تلفانه عيني عليك يا أعور
يا ابن مصر العفي عمرك ما كنت أعور
فتح عينيك لتنين وعن مصر لا تعور
ليست هناك تعليقات:
إرسال تعليق