صورة
شعر: كريم الشاوري
الريف بشر
من نوع كده شبه القمر
شكل السهر
لامم ملامح الليل
وواخده ف سكته
والصبح قام على حيله
بيردد غُنا من غنوته
يزرع ف قلبى ضحكته
يا ملامح الشمس اللى فيا بانى بانى
وإفتحى مرة بيبانى
وإرسمى لوحه
تعبّر عن كيانى
عن كيان كل البشر
وامحى سواد الليل
فيطلع فجرك الوردى
على قدِّك على قدِّى
وبسمة علينا بتندّى
ويسكن فجرك المنضور
على الشجرة كما العصفور
ما تقيديش الحلم بين براوزك المكسور
عشش عليه العنكبوت
يقتل ف جوفه ألف صوت
الصورة ملمحنا وحياتنا
لو تغيب الروح تموت ......
شكرا لمدونتكم الموقرة على النشر
ردحذفوهذا شئ جميل منكم