حا نقولها "لأ"شعر : عبده الزراع
حا نقولها .. "لأ"
و"لأ" قويه
لأجل أيامنا اللى جاية
ولجل موت الدكتاتور
ولجل نور الشمس يطلع من جديد
جايب نهار بكره الوليد
حانقولها "لأ"
محناش عبيد
احنا أولاد النهار ده
بعد خوفنا ما راح بعيد
حانقولها.. "لأ"
وبأعلى صوت
من نفسنا يبقى لنا صوت
بعد السنين المجدبه
بعد العذاب والهم
وأيام الغبا
حا نقولها "لأ"
ولو نموت
دا "سبارتاكوس" قالها زمان
من قبلنا ولا همهوش
دفع حياته تمن لها
قالها جريئه بدون مواربه
ولا انكسار
وصار امام الرفض
فى الزمن المحال
حانقولها "لأ"
علشان نعيش
من غير رقيب يعد أنفاسنا
ويحصى دقات القلوب
حا نقولها "لأ"
علشان نجيب لبلدنا
دستورها الجديد
اللى يليق بمصرنا الحلوه الوليده
حانقولها "لأ"
و"لأ" عنيده
حا نقولها جميعا كلنا
بقوه شديدة
ليست هناك تعليقات:
إرسال تعليق