2011/04/21

"امسك حرامي" قصيدة لياسر الششتاوي

امسك حرامي
شعر : ياسر الششتاوي
************
امسك حرامي
من لسانه
جمّع الناس
يعرفوا أصله
عشان تبقى الحقيقه مجلجله
خدع العيون
بشوية الحركات
وقلنا شاعر الجمهور
وصاحب منزله
أتارى مداري
لص جامد
في هدوم الحنجله
يطلع علينا
بالطهاره يدّعي
يحكي حكايات
والغلابه يصدقوا
يدهن كلامه
بالنفاق حبه
وحبه يلزمه
ينجرّ ف دور مرجله
حفظ الجميع شعره
وتاري شهرته
من سرقته
ظن الأمور
ممكن تمشّي
لجل يضحك ع الدقون
شال طبلة التمثيل
وطبلته مذهله
فجأه
يبان إنه حرامي
يخسر العشاق
ويخسر مهنة السرقه
يجوع
تنطيط على الشرفا
وجوع اللص
أكبر مشكله
امسك حرامي
من لسانه
واقطعوه
علشان يبطّل يدّعي
واوعوا
يصدق حد
صوت الطرمخه
ويكون سفير المهزله
لازم يعاقب
طهروا الساحه
من الأفاق
بلاش نبني جحور
تأوي العقارب
دا العقارب كلها
قرص الخيانه تحلله
امسك حرامي
من لسانه
قبل كدبه
ع الوضوح
ويبرطل الواد
ع الحقيقه
أو تموت المسأله


21 ـ 4 ـ 2011

ليست هناك تعليقات: