خليك موجود فى حياتى .. وبس.؟
شعر: مجدي محمود
من فين ما تروح حتعود
خليك موجود
فى حياتى
وبس
الطبل خلص
والرقص
ياسلام على لحظة همس
مابينا
الضحكة تخش
والنجمة ترش سماها....
تغش
ياسلام على لحظة يأس ....
مابينا
والعصفور اللى من بدرى
على الشباك
بالرعش
طمنته
القلب اتحش
والدمع اترش
والناس مابقتش
بتسمع حس ؟
ياسلام على لحظة غمز ولمز
خليك سهران
الفجر بقاله زمان
مرفوض
والصبح مالهش حدود
ياسلام على لحظة لمس....
مابينا
إوعى تسلم او تستسلم
اشتم فيا وبس!!
وحاشتم فيك
وحاطلع حب عنيك
وحاتكدب حاكدب
وحاتُصدق حاصُدق
وحالاعب فيك ،
وهاوريك
النجمة فى عز الضهر
والحكايات حفظينها
والألاعيب
لاعبينها سوا
عارفين السكة
حوارى
ونواصيات
ياسلام على لحظة دهس
ما بينا
وان كان ع الهم
هجم
وان كان على خوفك
منى
اوعى تخاف
او تطمنلى
اوعى تقرب
حاسب
إوعى تسيبنى
وان كان على حزنى
طنشنى
خليك
موجود
فى حياتى
وبس .؟
ياسلام
على لحظة طمس مابينا
اتنين فى الشارع
مش لاقيين
بعض
رافضين بعض
ماسكين ع الواحدة
لبعض
يدخلوا فى متاهة
بعض
يخرجو من بعض
اساميهم مش لاقينها
حاسين باللذة/ اللبس
ياسلام على لحظة يأ س
بندوّب سم اللحظة
فى كأس
نشرب على مهل
نتلذذ
بس
ياسلام على هذا الطقس .؟
مابينا .؟
ليست هناك تعليقات:
إرسال تعليق