2011/09/26

" فلول" قصيدة للشاعر ميسرة صلاح الدين

فلول
شعر :ميسرة صلاح الدين

انا كنت واحد انما
جوايا كانوا كتير فلول
جوايا كانوا الفلاحيين
مبيفلحوش
جوايا كانوا الخبازين
مبيخبزوش
جوايا خان البحر
ملحه مدوبوش
جوايا خان الشط بحره
مرساهوش
جوايا سلسلت البشر بالعرى
وسترت الوحوش
انا كنت واحد انما
غضبت عناكب شهوتى
فى ماذن الحق البتول
كرمشت وش المحكمة
وخرجت من باب الدخول
وقت اكتمال الحلم فى الافق الصبى
روجت كوابيس الأفول
انا كنت واحد انما
(يا ظلوم يا جهول يا بتاع
التفاحة يا انسان)
جوايا كانوا كتير فلول

ليست هناك تعليقات: