2016/03/21

كان وسيما إلى أن تكلم.. قصة بقلم: إسراء أبوزيد

كان وسيما إلى أن تكلم 
إسراء أبوزيد
جميله مجرد فتاه لم يكن الزواج حلمها الحقيقي ,ولكن العائلة والمجتمع والناس هم من يفرضون ذلك الحلم , وأحيانا يجعلونك تتألم في اليقظة ويصبح الحلم كابوس..
الزواج سُنه ولم تكن فتاتي تعارض هذه السُنه ,لكنها لم تجد الرجل الذي يغير تفكيرها الرجل الذي يأسرها بنظراته , الزواج بالنسبة لها كان سوء اختيار وليس قله عرسان ...
لا توجد فتاه لا يلهث وراءها الرجال ... ولكنه في المقابل اختيار صعب وقرار أصعب .. إليكم فصل من حياه جميله مع احد العرسان ..........
ايو.. الو .. الو .. يا قنديل أزيك يا اخويا... إيه؟ الصوت بيروح ويجي .
إحنا كويسين .. إيه مش سمعاك خالص
طب بص انا بخطب لعزايم وعند العروسة دلوقتي
لا.. لا بنت ناس محترمين وطيبين قوي
كتر خيرك يا قنديل هي في حجم شمعه بنت أزهار
سلامتك يا غالي .......... مع السلامة
أم جميله : خير يا ست أم عزايم ؟؟
دا قنديل اخويا بيكلمني من السعودية يا ست أم جميلة وبيسأل عشان يجيب للعروسة عباية وهو جاي .
أم جميله : يجي بالسلامة
كنت اجلس واستمع للحوار باهتمام ..والله دا علي اعتبار إني خلاص وافقت وهتخدوني معاكو وانتو ماشيين (انا في سري )
ضحكت لحماتي أم عزايم قائلة : يجي بالسلامة يا طنط
أم عزايم:تؤتؤتؤتؤتؤتؤ طنط إيه قوليلي يا ماه أنتي زي بنتي برضه
اضحك قائله : هههههههههه حاضر يامه
أم عزايم:شايفة طالعة من بؤك حلوة أزاي.. ايون كده دا إحنا هنبقي أهل , ونظرت لامي قائلة استأذن انا بقه يا م جميله وبكره أجيب عزايم يشوف العروسة. وتأخذني بين أحضانها سلام يا عروسة أشوفك علي خير بكره
أمي ردت فرحة : تشرفي في أي وقت بيتك ومطرحك يا أم عزايم.
.......................................................................................
أمي كالعادة فرحة وسرعان ما تعلن موافقتها وفرحتها...
أمي:أما يا أبو جميله متعرفش الست دي طيبة أد أيه ارتحتلها أووي
أبي: المهم جميله يا حجة
أمي :هي بنتك بيعجبها العجب موقفة حال الدنيا
أبي: كل شئ نصيب يا م جميله
............................................................
وفي الموعد المحدد
عزايم قاعد مربع أيده وينظر للأرض
افتكرته نام لقيت أمي بتنبهني: شايفة الأدب والاحترام شايفة الأخلاق
أرد بإعجاب بهيئته: لا هو من ناحية أخلاق فهو أخلاق وسيم وطول بعرض راجل راجل يعني
انتبه علي صوت :والله يا بو جميله من ساعة ما شفت الآنسة جميله معاك وأنت بتصلح العربية قلت هي دي مرات اخويا . ( الاسطي شفيق اخو عزايم )
أبي : ربنا يبارك فيك يا اسطي شفيق
أم عزايم : متخلي العرسان يكلمو مع بعض شويه يا أبو جميله دا بعد أذنك طبعا
أبي : اه قوي قوي
........................................................
إيه الواد الأمور دا ( انا بس ف نفسي ) قاعد مربع أيده برضه وساكت وبعدين أبدء أنا بقه الكلام وخلاص .....
جميله : أزيك يا أستاذ عزايم
عزايم: بخير يا انسه جميله
جميله: نورتنا النهاردة
عزايم : الله يخليكي دا نورك
جميله : هو أنت دراستك أيه ؟
عزايم :دراسة ايه يا أستاذه هو العلم بيأكل عيش
جميله :أمممم علي رأيك .
عزايم : أنا كنت في الدبلون بس مكملتش
جميله : يا أهلا وسهلا
عزايم: أنا كنت بحب الدراسة بس الشغل أحسن
جميله : أه طبعا
عزايم : طب أديكي معاكي شهادة أهو عملتي بيها ايه ؟
جميله : ولا حاجة
عزايم :خلينا في المفيد
جميله : أتفضل
عزايم :أنا قولت لأخويا انك مش هترضي بيا عشان معاكي شهادة بس قالي معتش فرق هو حد لاقي عرسان اليومين دول ولا ايه؟
جميله : ايه ؟ هههه ...... أه طبعا حد لاقي
عزايم :أنا من عيله ميكانيكية أصلا دي الشغل الأساسي بتاع عيلتنا بس أنا الحمد لله ربنا كرمني واشتغلت سواق في شركة ومرتبي فوق 700جنيه .
جميله : ماشاء الله ربنا يكرمك ويزيدك
عزايم :بصراحة انا كمان ابن بلد وأفهم في الأصول ومحبش مراتي تشتغل ولا تخرج من بيتها غير معاي طبعا
جميله : آه حقك طبعا
عزايم : وشهاتك بقه ابقي نفعي بيها العيال ,عيالنا يعني ....
جميله في ذهول مما اسمع : آه طبعا
عزايم : بصي يا آنسة جميله طالما امي واخويا ارتحولك فاعتبريني موافق .. اتشاوري مع الجماعه بقه وأبقو ردوا علينا ...
جميله : حاضر
.........................................................
كان وسيم الي أن تكلم .. صحيح المرء مخبوء تحت لسانه .
كنت في حاله من الدهشة والاسبهلال بصراحه هو وسيم وأمور وبيشتغل كل دا كويس ،بس التعليم ..........
امي :متعقديش الدنيا ،ناس كتير متعلمة ومعاها شهادات عملو بيها ايه يعني ؟
أرد علي أمي برفق : والله .. معملوش بيها حاجة ،أمال كنتم بتعلموني ليه بقه ؟
أمي : بلاش فلسفة خايبة .. عريس حلو وابن ناس
أتوجه لأبي بالحديث ليتدخل : تكلم أبي ساكت ليه ؟
أبي : هما كويسين يا جميله يا بنتي
جميله : يعني عادي أتجوز واحد معهوش شهادة عشان حلو وكسيب
أبي : مبدئيا الناس موافقين علينا قرروا عشان نرد عليهم
أمي في حزم :طبعا موافقين .
إلا إن ردي كان قاطع : مش موافقة وكفاية تاخدي قررات بالنيابة عني .
.....................................................................
بعد مرور أسبوعين
أبي : الناس اتصلو يا بنتي وعاوزين يجو . هما كويسين انا سألت عليهم .. سيبناكي براحتك تفكري
جميله : خليهم يجو م أنا كلامي مالوش لازمه
أبي في حنان وفرحه : بارك الله فيكي .واذا كان علي التعليم مش مشكلة المهم انه بيشتغل وكويس وابن ناس
جميله : ماشي .
............................................
وكالعادة وفي الموعد المحدد
لولولولولولولولولي .... سلام عليكم أزيك يا أم جميله أزيك يا أم العروسة
ترد امي بحفاوة: أهلا يا أم عزايم أتفضلي ياختي ,أزيك يا عروسه اللهم صلي علي النبي قمر 14.
امي :اهلا وسهلا
أم عزايم:تعالي يا عزايم متكسفش أدخل.
أمي : سلمي علي الأستاذ عزايم يا جميله
ابتسم واسلم عليه :أهلا وسهلا أتفضل
عزايم : أهلا يا آنسة جميله
وبعد السلامات و تداول الاخبارات ....
أم عزايم : إحنا بنفهم في الأصول وبصراحة يشرفنا نسبكو وجايين نتفق معاكو وتحت أمركم في كل اللي تطلبوه
أبي : الله يخليك يا ست أم عزايم
أم عزايم :أنا ربيت ولادي علي الأصول بعد وفاه أبوهم كنت أب وأم وربيتهم رجالة
أمي : ماشاء الله ربنا يخلي ويبارك
يتدخل شفيق في الحوار: ربنا يخليكي لينا يا حجة ويبارك لنا في عمرك
نظرات حانية من الأم : يعافيك يا بني ويرضيك يا رب .
أم عزايم :بعد أذن ابو جميله عزايم يقعد مع العروسة ...
هو مختلف ليه المرة دي عن المرة الي فاتت؟؟؟؟؟ (بقول في نفسي )
عزايم :أزيك يا آنسة جميله ؟
جميله: بخير الحمد لله .
عزايم : البلد حالها مقلوب من بعد الثورة والدنيا هايصة في بعضها
جميله : أنت ضد الثورة ؟
عزايم : آه طبعا ثورة إيه يا أستاذة دا شوية عيال ولاد....... مالهمش أهل الله يخرب بيتوهم .
الثوره دي جت علي الغلابه الي زينا.
جميله : انا مع الثورة علي فكره وشاركت فيها
عزايم :نعم !شاركتي فيها أزان يعني ؟رحتي التحرير وكده ؟
جميله : أيوة
عزايم : لا والله أنتي بتكلمي بجد ولا بتهزري
جميله : بجد جدا
ثار وماج ..لا يا أستاذة استني يامه متتفقيش علي حاجه . الله يرحمك ياباه مشفتش مرات أبنك كانت في التحرير
أم عزايم : تحرير أيه ياوله اللي بيجي في التلفزيون ؟
عزايم : آه يا امه ، قال ايه كانت في التحرير
أم عزايم : داهيه توقف حالهم بتوع التحرير دول
امي ( تتدخل لتهدئ الموقف ) :بس استهدي بالله كده يا أم عزايم .
الكلام دا بجد يا أم جميله ؟ أم عزايم بتسأل بنظرات غاضبه لامي
امي ترد: و فيها أيه يا ختي ؟
عزايم :يالا يا امه ،فرصة سعيدة يا حج .. قال تحرير قال!!!!
ينهض الاسطي شفيق بدون كلام وفي يديه علبة الجاتوه باتجاهه الباب
جميله : أنتو واخدين علبة الجاتوة في أديكو تاني؟!
أم عزايم :أيوه يا ختي إحنا أولي بيها .
.........................................................
كنت أعلم جيدا أن مثل هذا الموقف لن ينقضي علي خير ، أمي معاتبه لي فور انغلاق الباب وراءهم
أمي : كده انبسطي طفشتي الناس وأرتحتي ؟
جميله : هو أنا عملت أيه ؟؟
أمي في ثوره غضب : بيتقوليله كده ليه وتزعليه؟
أبي يتدخل ليهدئ الموقف : استهدي بالله يا أم جميله صحتك مش كده
جميله : ازعله !!!! ينفلق مع السلامة
أبي : كويس إنهم مشيوا لأني أحب جوز بنتي يكون معاه شهادة محترمة زيك كده ..
جميله : بجد !! يعني مش زعلان يا بابا ؟
أبي : أبدا أنا تهمني راحتك ..
أمي : حد لاقي عريس زى ده طول بعرض منك لله يا جميله مش هتفرحيني في حياتي أبدا .......

ليست هناك تعليقات: