آهة...!!لما يزيد الوجع عن طاقة الواحد
القلب يتلفلف..
ويتكتف ف سجن لونه خوف..!
الوحدة خل وفى
ف ضلمته بأتنفى..
يضمنى الحرمان..
بريشة ماتت فى جناح فرحان
عطشانة حرية
لا دمى عاد هو .. ولا الحياة هى..!
مسروقة من ورد روحى ريحة الدنيا..
وبراءة الحواديت... ...وشقاوة الألوان...
ومش بأشوف بكرة
ولا بأعتقد ف النحس ...
لكن مسكت الزيف
فوق قبرى داير رقص..!
ولمست جلد الكدب
كان ملمسه شايك
والقسوة ف الطرقات
كانت ضلام حالك
يا دنيا مش سهلة
أيه شقلب أحوالك...؟؟
لما بأروح ف النوم
وده شيئ عزيز جداااا
بأشوف هناك مثلاَ....
مرايل الأصحاب..
وتختتين وكتاب..
وجدتى آمنة...
والصحبة والخلان...
عمرى ما شفت (الآن ).....!!
بأصحى وقلبى بالألم عرقان...
وألاقى دنيا من حجر صوان...!!!!
اللى يجاور روحى يتكوى بنارها.....!!!
وحدى بأعيش وحدتى
يا مُر اسرارها....
معجون بمية ألم..
ومتاهة يا قلبى.....
ياللى زرعت الوجع ...
وكلت فيك ربى ....
ليست هناك تعليقات:
إرسال تعليق