حرب الردة
شعر: ميسرة صلاح الدين
"لو لم تكن شابا رقيق القلب
ما أنفضوا من حولك "
الطير كان أبابيل
أما البشر
كانوا فراش مبثوث
دلوقتي بس
القاهرة تنور
برعاية الهكسوس
بإعلانات
لمسيلمة الكداب
بيبيض الأزهر
والباقي من جيش
المغول
هايعلنوا الإسلام
ويبطنوا الصور
اللي كانت
تعبيرية مفخخة
دلوقتي طلعت حرب
ينزل من التمثال
وينادي في الشارع
ببضاعة مسروقة
سوق الحلاوة جبر
وعساكر الوالي
ماسكين عرايس ورق
بيخرموا فيها
لحفظة القرآن
أما الطواشي صبيح*
حيلفله له سيجارتين
ولويس يقعد مبتسم
برداء يصِف و يشف
أبو زيد وصل تونس
وانقطعت الاخبار
فات من هنا الثوار
واتفرقوا الأخين
الفرض جهر وعين
نويت اصلي ركعتين للوطن
قبل أما يحيوا
شعائر المولوتوف
ـــــــــــــــ
صبيح: الشخص الذي أوكلت إليه حراسة لويس التاسع قائد الحملة الصليبية على مصر بعد أسره في المنصورة.
والطواشي لفظ مهجور يعنى الحارس
ليست هناك تعليقات:
إرسال تعليق