في الميدان!!
شعر: صفاء البيلي
وأنا..
اللي دقت في هواك..
الهوان
ومن قبل كل اللي جوم من زمان
عشقتك
وشلتك في عقلي الصريح
ودبت ..
وفردت لخيالي العنان
خيالي..
مهواش مريض أو كسيح
ولا كان فؤادي
بسهمك جريح
دا كان في ميدانك فرس..
ديدبان!
وقلت إني شبهك
وقلت إني منك
فحني عليا..
فرديت إنت..
بإنه جنان
فهل تسمحي لي بسؤالك سؤال؟
سؤال م التاريخ اللي لعنينا..
بان
لإمته هتفضل ردودك رمادي ؟
وإمته هشوفها شموس..
كهرمان ؟
صريحة ومريحة
وطلقة حقيقة في وش الجبان
ومعلهش لو قلت ..
إنه جنان
حقيقي جنان؟!!
جناني اللي جاي واللي موجود
وكان ..
وكان عدل عقلك
وظلمك كمان
تركتك ..
رحلت بلا أي زاد
سوى مر شلته في سلة وداد
وصبري يغطي وشوش العباد
هجرتك ..مكان
رحلت ..
وغصة حنين في الفؤاد
ـ قلت:ابن بطني ..!!
سمعتك..
فجيت قلب حضنك تمام
مهو انت حبيبتي
وانت اللي ليا..
ورب العباد
فوقنا شاهد كمان
م انا نفسي أقابلك
وباحلم أقابلك وابص في وشك
هنا من زمان
فإوعي تقولي إن حلمي جنان
وإيه يعني..
قولي بإنه جنان
أنا يا حبيبتي
بموت فيك خالص
فنفسي أعيش فيك ..
برضه
وخالص
وكان نفسي أقابلك
قوى من زمان
وكان نفسي أحس ف ضلوعك..
حنان
ولما قابلتك
لقيتك فتية
لقيتك صبية
وست الصبايا
وعمري اللي ضايع في وسط المزابل
لقيته ف عيونك هناك في الميدان!!
ليست هناك تعليقات:
إرسال تعليق