المختلف..!! بقلم : محمود أحمد على

المختلف..!!

القصة الفائزة بالمركز الثاني في مسابقة اتحاد كتاب مصر فرع الإسكندرية لهذا العام

بقلم : محمود أحمد على

رحنا  نتراص كقوالب الطوب أو مثل الأسماك داخل علبة السردين _ أقصد داخل الميكروباص الحديدي المتآكل بشدة  كأجسادنا _ وكلما دخل علينا راكب جديد ، أجد الركاب يتهامسون في غيظ شديد :

- يا مسهل يارب ..

- هوِّن يا مهِّون ..

- باقي كده كام راكب يا جماعة ..؟!

تمنيت لو أن شيئاً ما يحملني حملاً ويسقطني فوق السرير؛لشدة سيرى طيلة اليوم بحثاً عن عمل .. أي عمل .. المهم أن أجد ( قوت ) يومي الذي من خلاله أستطيع الزواج من " وطنية " حبيبة قلبي ، التي يطمع فيها كل شباب القرية بل والقرى المجاورة ، لم يكفهم هذا بل هم يتصارعون عليها كما تتصارع الذئاب على الفريسة ، ليس حباً فيها ولكن حباً وطمعاً فيما تملكه من أموال وأفدنة زراعية قد ورثتها عن والدها ، وراح يبعثرها في حرية شبه مطلقة زوج أمها ، ذلك الرجل الذي أجلسوه رغماً عنا على كرسي العمودية ، فراح يخرب في البلد كيفما يشاء ، والذي صنع شبكة جيدة الصنع للإيقاع بأمها فور موت زوجها ، وقد نجح  بجدارة ، وفاز بالزواج منها وبما ورثته عن زوجها ، ولولا طيبة أمها وتمسكها الشديد بي ، وعلمها بحبي ومدى إخلاصي لابنتها " وطنية " منذ الصغر ، ولولا حديثها الدائم والمستمر لزوجها عنى من أجل أن تلطف الجو فيما بيننا، لما صبر علىَّ طيلة هذا الوقت في البحث عن عمل ؛ فهو رجل مادي يقدس الجنيه بل يفضله على أبيه ، وهذا ما يتردد على أفواه رجال ونساء بل وأطفال القرية والقرى المجاورة .

- نادوا على السواق .. العربية كملت ..

قالها فرحاً أحد الركاب ، وراحت عيوننا بدورها تفتش هنا وهناك عن السائق ، الذي جاء يتبختر على مهل ، وهو يأخذ أنفاساً متتالية من سيجارته . عجباً إنه قريب الشبه بعمدة قريتنا ذاك الحاكم بأمره ..وقف أمامنا .. راح يحدق في وجوهنا ، وهو ممسك بباب الميكروباص ، ثم قال في قرف شديد :

- مالكم فيه إيه ..؟!!

أجابه أحدنا :

- الميكروباص كمل ..

- ومين قالك إن الميكروباص كمل ..

-  زي ما انت شايف ما فيش كرسي فاضي ، الكراسي كلها كومبليت ..

- والله إنت اللي مش شايف ..

ثم راحت عيناه تحدقان في عيوننا وقال :

- أنى حركَّب الضعف يا افندية .. واللي مش عاجبه يتفضل ينزل .. الباب يفوت بدل الجمل جملين ..

- بس الضعف ده حتركبه فين يا أسطي ..؟!!

- لو حصلت حاقعد كل واحد على رجل التانى ..

صمت برهة ثم عاد يقول :

-  قلتوا إيه ..؟!!

- رحنا نحدق في بعضنا البعض في صمت واستسلام ..

- قلت أنا مش عاجبنى ..

قالها الشاب الجالس بجواري في قوة وغيظ ..غاضباً مد يده يفتح باب الميكروباص

- هو فيه إيه ..؟!!

قالها السائق في ثقة وسخرية ، ومن خلفه أجابه الشاب بنفس لهجته :

- فيه إن الحال ده مش عاجبنى..

في تعجب من أمره ، قال السائق ، وهو يهرش كرشه :

- يعنى إيه ..؟!!

- يعنى أنا مش عبد عشان أسمع في استسلام أوامر سيدي ..

في سرعة غاضبة راح السائق يقول مستفسراً :

- يعنى مش حتركب ..؟!!

- لأ ..

قلت من خلفه :

- ده آخر ميكروباص في الموقف و ........

قاطعني الشاب المختلف في قوة وعناد :

- مش مهم ..

ومن خلفي قال أحد الركاب :

- احنا في الشتاء والجو برد والساعة دلوقتى واحدة بعد نص الليل ، وباين على الحتة إنها حتمطر و ......

قاطعه هو الآخَر في حدة وثقة :

- برضه لأ .. حتى لو اضطرتني الظروف إني آخد الطريق زحف على إيدى ورجلي  ..

- هاء .. هاء .. هاء .. هاء

ضحك صاحب الميكروباص ضحكات كثيرة متتالية ، تلك الضحكات التي جعلت(كرشه)الممتد أمامه يعلو ويهبط كما الأرجوحة،ثم قال ساخراً:

- عايز تفهمني إنك حتمشى المسافة دي كلها على رجلك و...............

قاطعه الشاب في ثقة :

- أيوه ..

- وفى ساعة زى دي ..!!

- أيوه ..

- طب وريني جمال خطوتك ..

وقبل أن يتحرك هذا الشاب المختلف ، أوقفته كلمات أحدنا  :

- اركب وانت اللي حتقعد على رجلي مش أنا ..

تبسم الشاب في وجهه ساخراً ثم قال :

- الفكرة مش في كده خالص .. الفكرة في إننا استسلمنا واستسهلنا كلمة نعم .. أو حاضر ، وبكده حنفضل على طول نقولها بشكل أو بآخر،أنا مش تلميذ في الفصل عشان أوطى راسي وأقول حاضر يا أستاذ،السلام عليكم أشوفكم على خير .

قالها الشاب في ثقة ، ثم راح يحدق في وجوهنا وانصرف في تحد صارخ ،في ضيق وقرف شديدين رأيت صاحب السيارة يحدق في الشاب المختلف حتى غاب عن الأنظار تماماُ . التفت إلينا السائق وراح يقول في خبث وثقة  :

- ياللا خلى ديابة الجبل تتعشى بلحمه،والكلاب تحلى بعضمه ..

قلت هامساً مستفسراً من الرجل الجالس بجواري :

- صحيح الكلام اللي بيقوله الأسطى ده ..؟!!

- أيوه صحيح تقدر تقول عليه من دلوقتى الله يرحمه ..

- يستاهل هو اللي جابه لنفسه ، يعنى كان لازم يطلع فيها ويقول الكلام الكبير ده اللي هو مش قده ، خليه يستلم بقى ..

رويداً ..رويداً ..رحنا نتراص داخل علبة السردين التي امتلأت عن آخرها بضعف العدد .

عدنا ننادى على السائق مرة ثانية ، فجاء على مهل وقبل أن يغلق باب سيارته ،راح يلقى علينا نظرة طويلة متفحصة وهو مبتسم ابتسامة المنتصر ، ثم قال في أمر كالواثق من نفسه :

- الأجرة زادت من تمانيه جنيه بقت بعشرة جنيه ..

عدنا نحدق في وجوه بعضنا البعض ، دون أن يتفوه أحدنا بكلمة واحدة ، خرج أحدنا عن صمته وقال :

- من إمتى الكلام ده يا أسطي ..؟!!

- من دلوقتى ..

- طب واللي مش معاه ..

- يتفضل ينزل زي الجمل اللي نزل ..

ومن خلفه قال ثان :

- طب خليها تسعة جنيه يا أسطي ..

- عشره جنيه .. واللي مش عاجبه ينزل ..

عدنا نحدق في وجوهنا الممصوصة ، يلفنا صمت دفين ثُم خرجت أصواتنا متوحدة في خضوع واستسلام :

- ماشى يا اسطي ..

قال السائق وهو يغلق باب الميكروباص :

- ناس ما تختشيش صحيح .. ناس ما بتجيش غير بالعين الحمرة ..

ثم نفخ في وجوهنا دخان سيجارته ، وأتبعها بضحكة عالية .

عاد وفتح الباب بعد غلقه ، وراح يقول في ثقة ، وهو يحدق في وجوهنا :

- أه نسيت أقول العشرة جنيه أجرة الفتوة اللي نزل ده هتتقسم عليكم ..

قالها السائق آمراً ..

عدنا نحدق في وجوه بعضنا  في عجز ، دون أن يتفوه أحدنا بكلمة ..

- قلتوا إيه ..؟!!

خرج عليه صوت أحدنا :

- واحنا ذنبنا إيه يا أسطي ..؟!!

رد فى ثقة وكبرياء :

- السيئة تعم والحسنة تخص ..هاء .. هاء .. هاء .. هاء - قلتوا إيه ..؟!!

أعادها علينا السائق ثانية ..

قلنا في توحد وتناغم :

- موافقين ..

انطلق الميكروباص ..

وأغلقت نوافذه كلها من جراء البرد الشديد ..

وتعالت أصوات شخير الركاب ..

وراحت رأسي تتحرك يمنة ويسرة ، لعلى ألمح طيف هذا الشاب المختلف ،  وجدتني أسائل نفسي في حيرة شديدة :

- لماذا تهتم به هكذا ..؟!!

- ربما كان صوتي الذي تمنيت أن يخرج منى فخشيت أن أخرجه

- ترى هل سيصل في أمان وسلام ..؟!!

- .........................................

أخرستني مفاجأة السؤال ..صمت برهة ثم رحت أقول :

- وكيف يصل والطريق _  كما أرى _ مقطوع .. مقطوع تماماً ، ليس به ( صريخ ابن يومين ) حتى أعمدة الإنارة غير موجودة ، ومنذ خروج الميكروباص لم تر عينى قط سيارة تسير بجوارنا،أو حتى تسير عكس الاتجاه..فكيف يصل ..؟!! وما زاد ( وغطَّى ) هذه الأمطار التي لم تتوقف لحظة واحدة منذ خروجنا من الموقف بخمس أو عشر دقائق تقريباً ، رأسي كاد أن ينفجر دون الوصول إلى إجابة .

خوفي الشديد عليه جعل النوم يخاصم جفوني، وكلما قررت أن أوقظ أحد الركاب ؛ لأتحدث إليه عن هذا الشاب المختلف  يمنعني صوت شخيره المرتفع ، فأتراجع على الفور ، وأعود لأحدث نفسي في همس وخوف ..

- عملتها ..

قالها السائق ولم يسمعه غيري ..

قلت مستفسراً وهو يهدئ من سرعة الميكروباص :

- فيه حاجهة يا أسطي ..؟!!

- الفردة اللي على الشمال من قدام هوت .. ولازم أغيرها  صحي النايمين دول على طول عشان يساعدونا ..

- ياللا يا خويا منك له ..

قالها السائق في غضب ، فاستيقظ الجميع رغماً عنهم ..

نزلنا جميعاً دون إرادتنا ..

منا من أخرج ( الإستبن ) من مكانه ،ومنا من راح يساعد السائق في (حل الفردة ) ومجموعة منا راحت ترفع السيارة عن الأرض قليلاً حتى يركب( الفردة ) الجديدة ، لعدم وجود ( كريك ) يرفع به السيارة ،أما أنا فرحت أحدق في اللا شئ،أدخل عيني في الظلام الدامس لعلى أعثر عليه عندئذ أستحلفه بالله أن يركب معنا منعني الظلام من رؤيته ، أو حتى على ما تبقى منه ،عاد وتحرك الميكروباص مرة ثانية ، ووجدت السائق يسير هذه المرة في بطء شديد لعدم وجود ( إستبن ) آخر ، كما قال لنا مسبقاً ، قلت وأنا أجفف ماء المطر من فوق ثوبي تارة  وتارة أخرى أحدق في وجوه الجالسين من حولي :

إنه ذنب الشاب المختلف ، الذي فرطنا فيه بسهولة .. نعم فرطنا فيه بسهولة ..

- الأجرة .. الأجرة

راح يرددها السائق علينا ، قلت مستفسراً في ضيق :

- إحنا وصلنا ..؟!!

- لأ .. إحنا في نصف الطريق ..

- طب لما نوصل بالسلامة إن شاء الله ..

- أنا باقول صحيهم دلوقتى..وخليهم يلموا الأجرة دلوقتى حالاً،واللا تحبوا أنزلكم في وسط الطريق،خلى الديابة والكلاب تنهش لحمكم ..؟!!

- لأ .. لأ يا أسطي حنلم الأجرة من بعض حالاً ..

قالها الركاب في صوت واحد ، رغم أنهم كانوا شبه نائمين ،تناول السائق _ من أحدنا مجموع الأجرة ، والذي قام متطوعاً بجمعها _ وراح يعدها على مهل، وما إن انتهي من عدها على أكمل وجه ، إلا وعاد يعدها مرة ثانية من جديد بصوت مسموع ، وسرعان ما صرخ فينا قائلاً :

- الأجرة دي ناقصة الجدع اللي نزل ..

رحنا نتلفت نحو بعضنا البعض في مذلة دون أن يفتح أحدنا فمه ، ويخرج كلمة واحدة ..

- فين أجرة اللي نزل ..؟!!

 - بس يا أسطي .................

قالها أحدنا الذي منعه خوفه من أن يكمل جملته لنهايتها ..

- ولا بسبس .. ولا نونو .. أنا باقول قسموا أجرة الأمُّور اللي نزل بينكم وبين بعض ، إنتوا سامعيني طبعاً ..؟!!

- طبعاً .. طبعاً يا أسطي ..

وسرعان ما راحت تتعالى أصواتنا؛لتحتج على بعضنا البعض:

- أنا مش معايا ..

- ولا أنا ..

- وإحنا ذنبنا إيه ..؟!

- هاء .. هاء .. هاء .. هاء

السائق ما إن سمع ورآنا على هذا الحال حتى ظل يضحك .. يضحك علينا بشدة .. 

- أيوه كدة ..

قالها السائق وهو يضع ( فلوس الأجرة ) كاملة _ كما أمر _ داخل جيبه بعد أن قام بعدها مرات عدة في تلذذ شديد ..

- خ .. خ .. خ .. خ .. خ .. خ ..

في توحد وتناغم مستمر عادت أصوات شخيرهم ترتفع من جديد..  

 - حمد الله على السلامة ..

قالها السائق في سخرية ..استيقظ الجميع ..نزلنا تباعاً كالسكارى الحيارى ..بعيون أجهدها الحزن والألم والشوق إلى الحرية ، رحنا نحدق في وجه الشاب المختلف ، الذي وصل قبلنا ، وانتظَرنَا .

- ازاي وصل ..؟!!

- وإمتي وصل ..؟!!

- ..................

- ..................

أسئلة كثيرة .. كثيرة جداً رحنا نطلقها في الهواء ، دون الوصول إلى أية إجابة .

            mahmoudstory40@yahoo.com