2014/10/31

(حكاية جحا ) قصيدة زجلية بقلم: جواد الدريويش

 (حكاية جحا )
 قصيدة  زجلية
بقلم: جواد الدريويش

وجد راسوا مع الصباح
وجمع حوايجوا
وودع أهلوا و حمارو
هو في طريق دمعات عينيه
مني شاف من بعيد دوارو
وقال
لا كتبت ليا الله نعيش فيك
غادي نبقى حيث
ما شي أحنا لكنختارو
مني ركب الكار
راس بدى كيقول ليه
رجع رابلادنا زينة
وراس كيقول ليه
داكشي علاش
صاوبوا طريق
من دوار لمدينة
وراس كيقول ليه
رجع
رابلادنا تقدمات
وراس كيقول ليه
داكشي علاش
البطالة كثرات
وراس كيقول ليه رجع
و متخليش لبلاد
وراس كيقول ليه
مالك عندك فيها المال
ودار ولولاد
وتفكر كلام بوه
مني قال ليه
سير أولدي جحا
وتهنا من الفقر وهاد لحمار
وكلام ميمتو
لقالت ليه سير أولدي
وجيب لفلوس وطموبيل
ورفع راسي في دوار
وصل عند الحراك
وداه مع جماعة لغابة
وقال ليهم
مابغيت يشوفكم حتى حد
لا سراحة ولا عساسة
ولا حطابة
ومني دجي الفرصة غادي
نبداو رحلة
رفع جحا عينيه
وشاف ما خلق الله
وأبدع
شاف طيور وشجر
وبدا يتأمل ويتمتع
وقال في نفسوا
بلادنا زينة
ولكن دنيا كتوجع
والأمل كنشوفوا مكاينش
وعلاش غادي نرجع
جا ليل
وشاف طير نور
مضوي في سما
وقال ليه
يا الكمرة
في قلبي جمرة
في قلبي نار حمرة
في قلبي هموم
مايفهمها
إلا الظلام
شكون يفهمني
وشكون يسمعني
وشكون يخليني
نطير بحال لحمام
وصلات بيا الحالة
حتى الموت
ونرمي راسي في لبحر
وصلات بيا الحالة
نوجد راسي لقبر
كن غير بقيت مع أحماري
خايف نموت
وما تبقى خباري
بدات نفس جحا كتحس
بندم
وخاف الناس تنساه
وبكى
وجاه الهم
وحس
بلا لبلاد بقى بغياه
بفقروا
وحماروا
وهبالوا
وبدى
كيقرب موعد المغامرة
وتمشي ضحكة زوينة معاه
وتمشي نكاتوا
وطموحوا
واحلاموا
وكلاموا
لتبغيه الناس
ومتلقاه
مشى يعلم الله
واش قطع
ولا لبحر داه

ليست هناك تعليقات: