2016/08/02

قصيدة الفايسبوك الشعبية شعر: سليم صيفي

قصيدة الفايسبوك الشعبية
شعر: سليم صيفي
 الجزائر
salimsifi123@yahoo.fr
مبروك علينا الفايسبوك وألف سلام على اللي لقاه ومشاه وعطانا المفتاح في صباح الرياح و الشكوك
فيه العالم والناقم والسردوك.
فيه الظالم والهايم والمهلوك.
فيه الشك والصك والمصكوك.
بيه نكون سلطان عابر بين الأوطان حاير كي نطوف نشوف الخوف حاير كي نطوف نشوف الشوك .
نتكلم مع كل الاجناس حتى الوسواس من الناس الحنين والشايب والقاصر والطالب و الشاعر والزين والرايس والعساس و الفرطاس
و الحابس و الصعلوك.
فيه اللي يقول انا فرعون بالعرض والطول، فيه اللي يقول انا مسكون بذاك الغول.
فيه الي يقول أرواح عندي تدخل جنة الكون و تأكل العدس و الفول .
فيه الي يحبك بلا ما شافك و اللي يكرهك ويبرق سنيه باش يبيعك في سواقيه بالغدر و الشوك.
فيه اللي يطبخ المكايد واللي يسلخ خوه واللي ينفخ بوه واللي يشبه المعتوه وهو ديما يعاند
فيه الرجل يعجن الكسرة و المرة تخرج البرة تسب الضرة والأخرى تشعل بالهدرة ثورة و
تقتل بالغدرة كثرة ما ننسى المغبون اللي يسال على عام الفين وخمسين وعام يطير الدلفين وعام يعوم السردوك.
فيه السوسة و البسبوسة و المعفوسة و الخشخاش.
فيه الهوشة و البربوشة و المحشوشة و الترياش.
فيه التوتة و الستوتة و الكتكوتة و التكباش.
فيه اللي يشرح كيف ينصح كيف ينطح كيف يجمع كيف يطرح كيف صابه الهبلان كيف ضربه السيلان كيف كان و كيف بدل البوك و الدوك و اللوك و صبح مهلوك.
هذا العالم مفتوح على العوالم ,فيه الحبيب و الطبيب و الغريب اللي يضرب الجيب .
بان الدبديب والتغريب هان الضعيف الغارق في بحر التجريب الغامق.
الأسواق تمد الفايسبوك تعقد اتفاق في ذيك الذيبة تفتح في هذا العالم القاتم الناعم الناقم الكلبة حاشاكم تنبح و الجاجة بالبندير تشطح و
موعد للروانب بالأشواق والمقصد تزرع الشوك في الأعماق.
عيش تشوف عيش تسمع.
عاد التمنشير فنان بالألحان.
عيش تشوف عيش تسمع
صبح مزيان بالألوان. القصدير يلمع و العين تدمع و التعنتير
شفت في هذا الفايس عفايس و رفايس .
واحد ناوي يتزوج و احد باغي يتعوج واحد باغي يرجع رايس بالبرانس و الدسايس زيد هو باغي يحل عينه في الناس يرفع صوته على الماس
باغي يكون عابس نكاس ما هو حساس يحط يده على خده و رجله على راس كل رايس و ناس.
هذا عالم مفتوح على العوالم .
ماني ضده ماني معاه.
فيه الغمامة بالرياح سايرة والفهامة في الملاح كاثرة والحمامة بلا حناح طايرة بها الاشباح دايرة تستنى البسمة النايرة و الملاح.
ماني ضده ماني معاه.
فيه بان النيف والسيف والضيف والتسويف اللي جر مولاه ورماه في بحر الطوفان.
فيه الداء و الدواء فيه الندى و الشواء نشكر اللي لقاه تعب في مسعاه.
يا ناس اسمعوني هذي حروفي في الأساس تطفي خوفي بالإحساس هي من فضل الله نتمناها في رضاه.
يا ناس هذا التصوير بالوجدان فيه التفكير بالألحان فيه التحذير بالريحان.
الفايسبوك صبح عنوان مزيان للزمان بالألوان قصدوه رجال ونسوان سكنوه جنون وصبيان.
نشكر صاحب الجاه الرحيم الرحمان عظيم الشأن الكل يترجاه اللي هدى لي حب التعبير وحب التذكير وحب الاوزان.
ابقاو على خير يا ناس الخير كحلان والا عربان هنا لهيه حتى في اليابان.

ليست هناك تعليقات: