الثورة قامت من جديد يا ولاد
شعر: عبده الزرّاع
كل العيون بتمر ع التحرير
وبتلقط التصاوير
زى الحمام ما يهج من جوا البيوت
يحج للتحرير
ما تخد لىّ صورة يا حبيبى هناك..
تحت العلم اللى مغطى الميدان
ولا العلم اللى مرفرف فوق..
فوق العماير والحيطان
فوق خد طفل بيعشق التعبير
خارج بعشقه للوطن
بينطور الأحلام على وشوش البشر..
طوابير
طالعين يحيوا الثورة والثوار
بكره أكيد أجمل
مين اللى واقف فوق عمود الكهربا؟
ماسك فى ايده علم
ويهتف الأناشيد
والضى غاسل وشوشنا
مين اللى راسم صورة الشهدا؟
فوق صدور البنات
مين اللى كاتب أغنية؟
بتمجد الأبطال
مين اللى راسم ع الجدار؟
مين اللى راسم ع الرصيف؟
مين اللى ناقش ع الكفوف؟
مين اللى ضارب ع الدفوف؟
مين اللى عازف لحن ثورتنا الشغوف؟
الله عليك الله
يا شعب يا مبدع
لما تريد بيكون
بشبابك الأحرار
الله أكبر.. الثورة قامت من جديد يا ولاد
ما تخد لىّ صورة يا حبيبى قوام
جنب المنصة أم الكلام الزين
أم الغنا والدندنه
يتربى جيل ورا جيل
وتنور القناديل
د هتافنا طالع غنا
من قلبنا للسما
ملعون ياليل العما
ملعون زمانا اللى كان
خانق الأوطان
والكلمة على طرف اللسان
حارم وشوشنا لابتسام
مانع بجبروته الآدان
بس الفرح أهو صوته عاد
الله أكبر.. الثوره قامت من جديد يا ولاد
•
ما تخد لىّ صورة يا حبيبى بجد
تحت السما لما تنطر حب
أنفاسها تحيينا
واحنا ف ليل طوبه
وسط الميدان.. ددبان
ومأنقجيين بعضينا
والنيل سعيد وبيغسل الوش الكئيب
تحت الرذاذ فرحان
من طلة الثوار
صوتهم نغم حران
بيرطب الوجدان
لمسة دفا وحنان
لافه وشوش العباد
الله أكبر.. الثورة قامت من جديد يا ولاد
•
ما تخد لىّ صورة يا حبيبى وبس
قلب الحجر بيحس
د أنا قلبى سبته هناك
ف المتحف المصرى
قاعد بيقرأ التاريخ
لجدنا المصرى
ويسطر الأمجاد
عن عصرنا العصرى
عن شعب هب وثار
وأسقط الأوغاد
والضحكة عادت للبلاد
الله أكبر.. الثورة قامت من جديد يا ولاد
•
ما تخد لىّ صورة يا حبيبى بسرعة
عايز ألحق القداس
وأزور ستنا العدرا
عايز ألحق أقرا الفاتحه للشهدا
وأصلى جوا الميدان
أو فى عمر مكرم
يا عم يا مكرم
واقف وساكت ليه
وانت الزعيم والامام
عجبك كلاب النظام
عمرك ما كنت جبان
واقف وشاهد عيان
على قسوة الطغيان
والشعب هب كالطوفان
يا عم يا مكرم
الصحوة عمت البلاد
الله أكبر.. الثورة قامت من جديد يا ولاد
الثورة قامت ومش حا تنام
إلا برحيلكو يا عسكر
الثورة ف الميادين
كل الولاد قايمة وبتعبّر
كل العيون بتمر ع التحرير
وبتلقط التصاوير
زى الحمام ما يهج من جوا البيوت
يحج للتحرير.
الأثنين 30/1/2012
ليست هناك تعليقات:
إرسال تعليق