2012/10/05

وليه يا خلق نتشائم شعر: محمد نجيب مطر



وليه يا خلق نتشائم
محمد نجيب مطر
لامتى نبكي أحلامنا
لامتى اللوم لأيامنا
وأيامنا بتلعنا
وتلعن كل متغرب
ومن حتفه بيتقرب
ولو خطوة
وأيامنا تنادينا
وعايزانا تعيش فينا
تعيش بكره
ولو فكره
ولو تكره
تفانينا
وتدينا
على ما الأفكار تودينا
***
يا متعذب حرام عيشتك
فين الشكر اللي من قلبك
و لا قبلك و لا بعدك
يكون شكار
لصاحب العزة والمقدار
وترضى باللي مقسوم لك
تعيش وتعيش
و لا تبقى حزين وتعيس
عيش الدنيا بأيامها
قليلة وحلي ألوانها
وعيش ف الكون
كما البلبل بساعه يكون
على شجرة يبات الليل
لا يشكي الويل
و لا المكنون
***
يا كل حزين
إيمانك فين
وليه تبقى تعيس وحزين
وفي الأرض النبات والطين
وأرض الله ماليها الخير
ورزق الله كتير ووفير
يارب الكون
أنا ممنون
وراضي باللي ترضاهلي
أنا واهلي
رضاك ياربي أمنية
وأحلى ياربي أغنية
أغنيها
وأعيش فيها أمانيها
وادندنها وأعيش ليها
ومنا وفيها نتمنى
وفي الجنة
نشوف أحلى معانيها







ليست هناك تعليقات: