الادان فى مالطه
محمد عبدالرازق زهيري

انا اللى من غلبى باهاتى
لشباب بلدنا ويوماتى
باهدى نصايحى وابياتى
وادعمها بالزجل الاتى
****
ياشبابنا مالك مال حالك
مش قول دى باينه افعالك
والحاله صبحت افعى لك
والموجه طايحه وم العاتى
****
دى امور بتشبه للهذيان
والعقل بالفم المليان
يصرخ يااخوان الشيطان
سبتوا الشباب عايش ذاتى
****
دلعت ابنك صار شمام
بغل الوسيه وماله لجام
ودا نتيجة اكل حرام
ولا دا اصله كان واطى
****
صرماح وداير على راحته
فارض سالته وبواخته
خادش حيا امه واخته
على كل ناصيه وفلاتى
****
وادى البنيه بتتقصع
وصدرها ارنب برطع
جنب المراهق تتمطع
والشاب كالفجل حراتى
****
والشاب ادمانه الخمره
ليلاتى يشرب فى السهره
وحياته صبحت نار حمره
تشوى شبابه المزاجاتى
****
والشابه مايصه وسنيوره
ماشيه فى شط المعموره
بمايوه فى حته مهجوره
متونسه بشاب عقاطى
****
وشابه تصبغ خلقتها
فى حين ما تخرج من بيتها
وكاشفه معظم جتتها
توب الحيا داب ياخواتى
****
وام العيون سوده بغماز
والجسم سوسته بالهزاز
ورمش عينها يقول الغاز
وتقول بااعيش حرياتى
****
سلوك يشينها ويهدمها
ولاحد قادر يحكمها
ولامين بيمسك فى لجامها
مهره وع الموضه ذواتى
****
وحين ماتقرا ياما تشوف
ادب وفيه جنس ومكشوف
وصف القوام مرمر ملفوف
 والقعر اعرض من باطى
****
ويضيع شبابك يابو راضى
وانت فى حالك مش فاضى
وتبقى على نفسك قاضى
والنومه تحلى وبياتى
****
وياريت بتصحى لاصولك
وانا اللى ناصح بادعيلك
داايما بااحذر واناديلك
وكانى فى مالطه باهاتى
****
راعوا شرفكم والسيره
دا شبابنا هوه اللى ذخيره
تمحى لنا شوك الحيره
والبرد من يومنا الشاتى
****
واصلى ع الهادى الامجد
طه اللى هديه كان اخلد
كان شاب صالح واتعبد
ونوره بدد ظلماتى
****
واحمد الهى وافضاله
واصلى ع الهادى واله
كان قدوه لينا بافعاله
يارب واقبل دعواتى
-------------------