شافت أبوها فى المنام
أحمد عبد الحكم أبو الحسن
بعد 22 سنة
شافت أبوها فى المنام
أمى اللى شايلة ف قلبها
سربين حمام
بيعششوا على سقف بيتنا
المبنى من قهر الحيطان
ويوقفوا برد الشتا
ف نقطة دفا
ولحظة أمان
على وشها خيوط الشقا
شابكه فى خيوط الحنان
زى كل الأمهات اللى ف بلدنا
طيبه
قلبها فرن الخبيز
بهجتها رغفانها الشهية
زى كل الأمهات اللى ف بلدنا
حنينة
عيونها دنيا بالفصول الأربعة
متربعة ف قلب البيوت
- حدوتة يا أما من حواديتك زمان
- كبرت بطل لعب
قوم ودى الطحين
أنام على حجرها أدلع قوى
أصغر قوى
تضحكللى هىّ بالقوى
وتخش بيا دنية الحواديت
النهاردة الصبح بدرى
والليل بيقلع هدمته
صحتنى من غفلة منامى
ف عنيها فرحة ما شفتهاش
غير يوم نجاحى
ويوم جوازات البنات
قالتللى شفت أبويا فى المنام
ضحكت أنا
بعد 22 سنة يا أما
ردت قوام
وإزاى كنت أشوفه بس يا وليدى
أنا اللى كنت بانام ما بحلمشى
غير بوش الفرن
لما يكون عندى خبيز
وخبزة عيش ما تفضحنيش
لما ييجى ضيف عزيز
وعمرى ما نمت ف عياكم
ألمّ الآهه من شفايفكم النعسانة
أحطها ف صدرى اللى واجعنى
وناقصنى أخش الإمتحانات بدل منكم
لما باشوف الأسئلة فى الحلم
بس يا خسارة
ما بعرفش أفك الخط
………………………
وبنظرة فيها من حنانها
من طيبتها ومن ألمها
قالتلى برضه
أدينى عشت
وشفت أبويا فى المنام
*قنا
ليست هناك تعليقات:
إرسال تعليق