2012/03/27

"روحه ابتدت ترفرف عليك" شعر/ حامد أنور

روحه ابتدت ترفرف عليك
شعر/ حامد أنور

الورد كان بيعرف يسرق حنية إيدك
هده انتظارك
وانت قلبك زي الحجر مش عايز يلين
بينام وجرحه لسه مادبلشى
علي الرصيف خد له ساتر
بينام والقلق شَرك بيتنصب له كل لحظه
وعيون البنات البكاري كرابيج
كل يوم علي الريق بيفتش عليك
وبيسأل الندي اللي ابتدي هو كمان يبخل
ويقلل زيارته..
الورد الدبلان لسه ماعرفشي قصدك
حتي انكساره علي غير العادة
كان فوجائي لباقي الزهور
كل الميادين والشوارع بتعرفه بخجله المميز
اللي مافيهوش تكلف
وصهد الصيف علي الرصيف
حاسس بذنب كبير تجاهه
والصهد اللي كان بيطلع من وشك
ساعة ما كنت تلمس نداه
.... كان برضه مميز
قلبه لسه بيرفرف عليك
وانت بتعاند شفايفك تلمس نداه
أو تبوح له بانشغالك من غير ما تقصد تجرحه
روحه ابتدت ترفرف عليك
موت الورد مش هيه الوسيلة للعقاب
موت الورد
يعني دنيا صامتة
يعني فراغ كبير
مافيهوش غنا ومزيكا ودوشه
وإيدين تحن لندي الورد يسرق منها الحنيه
وهيه عارفه ومتطمنه
ومش خايفه أبداً


ليست هناك تعليقات: