ــــــــــــــــــــــــــــــــــــــــــــــــــــ
تاريخ العرب
ــــــــــــــــــــــــــــــــــــــــــــــــــــ
د.سوسن أمين
آه يا تاريخ العرب .. كما السلاسل من دهب
بتعلي أبطال الكفاح .. وتلعن كل من هرب
نقرأه بروحنا ودمنا .. نقرأه نحن لبعضنا
جمعتنا معطيات النجاح .. وده تاريخنا ومجدنا
أخوة كنا من الأزل .. كلمة وقالوها في المثل
أنا وخويا على الغريب .. يا جمع عمره مأنهزل
عيزنا ننكر أصلنا .. ونفكر بس في
نفسنا
هم يقولوا ده عمان .. وأحنا نقول ده مصرنا
من يومها أمة واحدة .. بس مين يرضىلنا بكده
إن يوم سعينا للأتحاد .. يموت من القهر العدى
عدو واقف بالسنج .. شغل العميل المذدوج
عنيهم طالعة على الخليج .. خلصوا فيه كل الحجج
بأمر محتال مفتشي .. قال يا لجنة فتشي
وهاتوا منها الأسلحة .. وأزهي يا دنيا وبشبشي
ده أنا عملها لكم مصلحة .. شفوا أمور الزلنطحة
عملها لعيون العرب .. علشان تزيد البحبحة
بعد مراحوا ودوروا .. قالوا سوري تتصوروا
مكنش فيها ولا عيار .. ولا حتى نبلة تعوره
كانت حقيقة مؤلمة .. تدمير عراقنا المسلمة
حكاية أسلحة الدمار .. فرية وكانت مجرمة
كنا بنلطم على الخدود .. لما كانت النيلة اليهود
دلوقتي ميغة وأمريكان .. معسكرين لنا على الحدود
عدوان ثلاثي مشترك .. مين يحوش وحل البرك
آه يا ناصر لو تعود .. وتكون مقدم على الدرك
تشوفوا البطولة وحقها .. مش خيبة تسلم بعضها
لو كنا بنعرف نعتبر .. لكفينا الشرور من أصلها
فينك يا خالد في القتال .. يا حمزة أشتقنا النضال
يا عمرو طالت غربتك .. لما أرتضينا الأحتلال
يا سعد ليك المكرمة .. بطل الفتوح المسلمة
يا طارق نادي على الفنار .. فين المثنى وعكرمة
ويجي راجل مش تمام .. طالع يقول أسوء كلام
العروبة ده شيء وراح .. يلا ننادي على
السلام
سلام ده إيه يخيبك .. يا مأمن
الريح على مركبك
ومالي جيوبك بالحرام .. وعمر الحلال ميغلبك
طالع تبيع قوميتك .. ومنها بتقضي
عدتك
ولا يهمك غير الدولار .. يا ميت ندامة لحضرتك
متقلش لهى كلمتي .. أيوه طبعا يا نكبتي
يا بوق بينعق بالخراب .. ويقول يالهوي ويا دهوتي
لو زيك فينا كام عويل .. خان العروبة والسبيل
تبقى على الأمة السلام .. وضعت يا بلد الخليل
لا قدس راجعة ولا عراق .. مدخلنا مدمار السباق
بأمثالك أشباه الرجال .. اللي ملهمش في الأشتباك
لو قلنا حرب يصوتوا .. ويلطموا ويعيطوا
ويقولوا خلاص مبقاش جهاد .. من يوم السادات مبططه
دينك ده شرفك وموطنك .. مش اللي قايم يتمنك
ويبيعك على أول رصيف .. بعد ما علفك وسمنك
المؤمن دينه معبده .. والعروبة دي
مسجده
شيء بيجري في دمنا .. مين اللي يفكر يبعده
رأس العروبة ومجدها .. نيلها الجاري لحدها
أحنا بنلم في شملنا .. وأنت بتسعى لهدها
المصري مصري بالوطن .. لكنه بالعروبة أتعجن
رغم عين اللي جابوك .. ده لو أفترقنا ننطحن
عايزنها دويلات صغيرة .. ولكل دولة مسطرة
نازلين بيها لسوعه .. لجل ميكمموها
في مندرة
علشان ميسهل شفطها .. وتقوم تسلم
مهرها
ويعيش لخدمتهم عبيد .. أهل العروبة وطهرها
لا أرجع تاني للهدى .. وأستغفر ربك من ما بدى
وتعال نادي على الكفاح .. ونادي حي على المدي
بوحدة تقطم وسطهم .. لما يلقونا زيهم
بأتحاد عربي محترم .. يهدهم ويزلهم
ده مصر قلب المسأله .. ثورتها ثورة مزهلة
ناوية ترجع اللي راح .. وتعيد العروبة الزائلة
ـــــــــــــــــــــــــــــــــــــــــــــــــــــــــــــــــــــــــــــ
ليست هناك تعليقات:
إرسال تعليق