2014/03/31

ياعد يله وخبرينى.. شعر: محمد عبدالرازق زهيري

 ياعد يله وخبرينى
شعر: محمد عبدالرازق زهيري


نظره منك ياجميله

يااميره ويااصيله

ياعديله وخبرينى

ع اللى حاصل واللى كان

ياللى داعيه للاامان

 لما تقضى ع المتيم

فى هواكى بالهوان

والجريح يبلع مرارك

وتقوليلى الحق بان

واحنا ديك الساعه لما

نلقى ليل العتمه هان

ييجى ديك الحب يدن

والادان يطوى العنان

والهمم تمحى الغشاوه

من عيون الالعبان

تعكم النجمه اللى طايره

من عناد الصولجان

وتداديها بحضن دافى

والعناد يصبح عوان

مش تسيبى الضل يوهم

او يسود شرع الغيلان

ييجى عيل يحبى يلعن

اللى جابه ف دا الاوان

ولا نسمة حب تهرب

من بيوت مالهاش حيطان

لما بين قلبين يحوجهم

دا الزمان للترجمان

يشرح العشق اللى باهت

واللى شارد م اللسان

لما  لما والف لايمه

ع المخادع والجبان

اللى ساب العش يجمع

بين حقيقى وبهلوان

بين غراب اجرب ونوحى

والكناريا فى الجنان

بين ضمير راضع هدايه

واللى عيشته فى اللومان

بين دماغ موزون بعلمه

واللى راس مالهاش ودان

بين عيون توهب تجلى

والعما خالى الضمان

بين ايدين ممدوده ترحم

والسياط فى ايدين سمان

بين جمايل ترضى قلبك

والغباوه مع الجيران

بين وبين ومنين تلاقى

اللى زرعه كان حنان

دا الحنان عدل والهى

والضلام منبت شيطان

سمعيهم ياعديله

يا اصيله صوت ادان

لجل يعلى الحب شامخ

مش ندلس فى الميزان

ليست هناك تعليقات: